د کار او ټولنیزو چارو نوي مالي او اداري مرستیال دنده پیل کړه
د کار او ټولنیزو چارو وزارت نوی مالي او اداري مرستیال وزیر مولوي عبدالعزیز نصیر نن خپلو کارکوونکو او مأمورینو ته په هغه غونډه کې معرفي شو؛ چې د کار او ټولنیزو چارو وزیر الحاج ملاعبدالمنان عمري، د کار چارو معین مولوي محمدزاهد احمدزي، د چارو ادارې د لوی ریاست د امارت پالیسیو معاون مولوي عبدالباري عاطف، د کار او ټولنیزو چارو وزارت مشاورینو، رئیسانو او کارکوونکو په ګډون جوړه شوې وه.
په معرفيغونډه کې د کار او ټولنیزو چارو وزیر الحاج ملاعبدالمنان عمري وویل: د کار او ټولنیزو چارو وزارت د کار چارو او همدارنګه د ټولنیزو چارو اساسي معینیتونو او په همدې توګه د مالي او اداري چارو حمایوي معینیت په درلودلو سره مکلفیت او مسؤولیت لري؛ چې د ټولنې تر ټولو مستحق، مظلوم او له زیان سره مخ اقشارو لپاره خپل خدمات وړاندې کړي او د هغوی ستونزې تر ډیره بریده حل کړي او د یتېمو او بېسرپرسته ماشومانو، ښځو او نورو اقشارو لاسنیوی وکړي.
، د چارو ادارې د لوی ریاست د امارت پالیسیو معاون مولوي عبدالباري عاطف، هم د مولوي عبدالعزیز نصیر د تقرر په اړه د امیرالمؤمنین حفظهالله تعالی د حکم له قرائت سربېره؛ د کار او ټولنیزو چارو وزارت له ټولو کارکوونکو او مسؤلینو څخه وغوښتل؛ چې له نوي معین سره په ټولو چارو او کارونو کې مرسته وکړي.
د کار او ټولنیزو چارو وزارت نوي مالي او اداري مرستیال وزیر مولوي عبدالعزیز نصیر هم په خپلو خبرو کې وویل: ژمنه کوم؛ کار او فعالیت به مو د اطاعت پر بنیاد باندې وي او هڅه مو دا ده؛ چې د افغان ولس تر ټولو مظلوم او مستحق قشر لپاره به په ټول اخلاص او صداقت خدمت کوو.
په پای کې مولوي عبدالعزیز نصیر د کار او ټولنیزو چارو وزارت د رهبري پلاوي په ملتیا تر خپل دفتر پوري بدرګه؛ خپلو کارکوونکو ته ور وپیژندل شو او خپلو چارو کې ورته د توفیق او بریالیتوب دعا وشوه.
