د کار او ټولنیزو چارو وزارت استول شوي پلاوي د کندهار ولایت له مرستیال والي سره وکتل
له پاکستان هېواد څخه د بېرته راستنېدونکو هېوادوالو د ثبت په موخه د کندهار ولایت سپین بولدک ولسوالۍ ته د کار او ټولنیزو چارو وزارت استول شوي پلاوي د دې ولایت له مرستیال والي مولوي حیات الله مبارک صاحب سره وکتل.
د کار او ټولنیزو چارو وزارت د تقنین او کار د حقوقو رئیس بشیراحمد راسخ په مشرۍ پلاوي، د کندهار ولایت له مرستیال والي مولوي حیات الله مبارک صاحب سره په کتنه کې د خپلو کاري فعالیتونو او پدې برخه کې د لاسته راوړنو او پرمختګونو په اړه ناسته او سلا مشورې ترسره کړې.همداراز د کار او ټولنیزو چارو وزارت استول شوي پلاوي څرګنده کړه چې د وزارت مشرتابه په دې هڅه کې ده چې بېرته راستنېدونکو هېوادوالو ته د مختلفو اړخونو په همکارۍ کاري فرصتونه برابر او د دوی لاسنیوی وکړي.
د کندهار مرستیال والي خپلو خبرو کې د کار او ټولنیزو چارو وزارت پلاوي ته د ښه راغلاست ویلو ترڅنګ بېرته راستنېدونکو کډوالو ته د کاري زمینو برابرېدل مهم وبلل او هیله یې وښوده چې ټولې ادارې په ګډه وشي کولای پدې برخو کې ښې او اغېزمنې لاسته راوړنې ولري.
