د کار او ټولنیزو چارو وزارت او مؤسساتو ترمنځ د ۱.۲ میلیارده افغانیو په ارزښت د هوکړه لیکونو لاسلیک
د کار او ټولنیزو چارو وزارت له نهو کورنیو مؤسساتو سره، د فن او حرفو او یتیمانو څخه د ملاتړ په برخو کې د ۱.۲ میلیارد افغانیو په ارزښت هوکړهلیکونه لاسلیک کړل چې له امله به یې په ۸ ولایتونو کې ۷۵۷۵ تنه هیوادوال مستفید شي.
په هغو مراسمو کې په همدې موخه جوړ شوې وو د کار او ټولنیزو چارو وزارت مالي او اداري مرستیال مولوي دینمحمد حقبین خپلو خبرو کې د فن او حرفې او د یتیمانو د ملاتړ په برخو کې د مؤسساتو سره د هوکړهلیکونو له لاسلیک څخه خوښي څرګنده او وویل: له ټولو ملي او نړۍوالو خیریه بنسټونو سره د غوره تفاهم اراده لرو او له ټولو بشري او خیریه سازمانونو غواړو چې د افغان ولس مظلومو اقشارو ته د خدماتو په وړاندې کولو کې لازمه همکاري ترسره او خپل خدمات د هیواد لیرې پرتو سیمو او سرحدي ولایتونو ته هم وغځوي.
ورپسې د کار او ټولنیزو چارو وزارت د بهرنیو اړیکو ریاست سرپرست حافظ عزیزالرحمان د یادو هوکړه لیکونو په اړه وویل: د ویاړ ځای دی چې نن یوازې له داخلي مؤسساتو هوکړهلیکونه لاسلیک شول چې له دې سره به د مستفدینو ترڅنګ زیات شمېرهېوادوالو ته په مستقیم او غیر مستقیم ډول د کار زمینه برابره شي. نوموړي له مؤسساتو وغوښتل چې خپل فعالیتونو د کار او ټولنیزو چارو وزارت سره په پوره همغږۍ تعقیب کړي.
