د کار او ټولنیزو چارو وزارت له لوري د وړتیاوو د تثبیت ملي پروسه پیل شوه
د کار او ټولنیزو چارو وزارت په نوښت د هېواد په تاریخ کې د لومړي ځل لپاره د مختلفو حرفو د تثبیت بهير پیل شو.
د پروسې په پیل غونډه کې د کار چارو مشاور او د وړتیاوو د تثبیت ریاست وارسيکوونکي انجنیر احمد عمران خروټي د بهیر ګډونوالو ته په خطاب کې وویل: له نېکمرغه نن د هېواد په کچه له مرکز او ولایتونو څخه په لومړي ګام کې ۶۰۰ تنه په لسو (نلدوداني، خیاطي، فلزکاري، يو پي وي سي، د تعمیراتو برېښنا، د يخچال، ایرکنډیشن، د نقلیه وسایطو، د کورنیو برېښنايي وسایلو او موبل او فرنیچر ترمیم، سولر سیستم او کمپیوټر هارډویر) حرفو کې د تحريري او تقریري آزموینو په پړاوونو کې ګډون کوي، چې په بریالي ډول د بهیر له پای ته رسېدو وروسته به په ملي او نړیواله کچه معتبر سندونه ترلاسه کړي او په دې سره به ملي پروژو او د کار بازار ته په معياري او ډاډمنه توګه ماهر او نیمهماهر کارګر ور وپېژندل شي.
په پام کې ده چې دې ملي پروسه کې به د هغو لسګونه زرو هېوادوالو چې په خپلو حرفو کې ماهر دي، خو رسمي سند نه لري وړتیاوې د مسلکي استادانو لخوا تثبیت او رسمي سند به ترلاسه کړي، چې موخه یې د کار بازار تنظیم او معیاري کېدل دي.
