د کار او ټولنیزو چارو وزارت نوی سرپرست وزیر معرفي شو
ښاغلی بشیر احمد ته ینج نن د يو لړ مراسمو په ترڅ کې د چارو ادارې لوی رییس ښاغلي ډاکټر فضل محمود فضلي له لوری د کار او ټولنیزو چارو وزارت د سرپرست او نوماند وزیر په توګه د وزارت کارکوونکو ته ور وپیژندل شو.
پيل کې د کار او ټولنیزو چارو وزارت پخواني سرپرست ښاغلي سید انور سادات خبرې و کړې، نوموړي، بشير احمد ته ینج ته د نوې دندې مبارکۍ تر څنګ زیاته یې کړه: د جلالتمآب ولسمشر له باور څخه مننه کوم چې ما ته یې وخت راکړ؛ څو د تر یو نیم کال څخه زیات د کار او ټولنیزو چارو له لارې د هيوادوالو خدمت و کړم.
د چارو ادارې لوی رییس ښاغلي فضل محمود فضلي د خپلو خبرو په ترڅ کې د ښاغلي ته ینج پخوانی کاري کړنې، فعالیتونه او لاسته راوړنې و ستايلې، زیاته یې کړه چې د افغانستان اسلامي جمهوري دولت کابینه چمتو دی،؛ څو په متحدانه ډول د جلالتمآب ولسمشر محمد اشرف غني تر لارښوونو لاندې یو ځای د یو ګروپ په بڼه کار وکړي. نوموړي، ښاغلي ته ینج سره د کارو په ښه ترسره کېدو کې د هر ډول همکارۍ ژمنه وکړه.
د کار او ټولنیزو چارو وزارت نوي سرپرست ښاغلي بشیر احمد ته ینج بيا د خپلو خبرو په ترڅ کې د جلالتمآب ولسمشر، د ملي مصالحې عالي شورا ریاست او همدا راز د مارشال عبدالرشید دوستم له باور څخه مننه وکړه.
نوموړي همدا راز د کار او ټولنيزو چارو وزارت مخکني سرپرست ښاغلي سید انور سادات فعالیتونه او هڅې وستایلي او ژمنه یې وکړه چې یادو هڅو او فعالیتونو ته به په راتلونکې کې هم ادامه ورکوي.
ښاغلي ته ینج خپلو ټولو همکارانو ته د پوره همکارۍ او په ګروپي ډول د کار ډاډ ورکړ او ژمنه یې وکړه، چې هره ورځ به تر ټولو مخکې دفتر ته راځي او له ټولو مامورینو وروسته به له دفتر څخه وځي.
