د کار او ټولنیزو چارو وزارت کې د رهبرۍ او مدیریت تر نامه لاندې روزنیز پروګرام جوړ شو

د کار او ټولنیزو چارو وزارت انسټیټیوټ ریاست له لوري د دې وزارت رئیسانو او آمرینو ته د کاردان پوهنتون په همغږۍ د رهبرۍ او مدیریت تر نامه لاندې یو ورځنۍ روزنیز پروګرام جوړ شو. 
هغه غونډه چې په همدې مناسبت جوړه شوي وه؛ په پیل کې د کار او ټولنیزو چارو وزارت د کار چارو معین الحاج مولوي محمد زاهد احمدزي راغلو میلمنو ته د ښه راغلاست سربیره د انسټیټیوټ او کاردان پوهنتون له همغږۍ او ګډو هڅو څخه مننه وکړه، او زیاته یې کړه، چې داسې روزنیز پروګرامونه د کارکونکوو د پوهې کچې د لوړولو او همداراز هېوادوالو ته د غوره خدمتونو په وړاندې کولو کې ارزښتمن او ګتور تمامیږي، تر څو په خپلو کاري ساحو کې ترې استفاده وکړي. نوموړي د کاردان پوهنتون څخه د لا زیاتو همکاریو غوښتنه وکړه تر څو په راتلونکې کې دې ته ورته نور روزنیز پروګرامونه  په لار واچوي.
 همدارنګه د کاردان پوهنتون رئیس دوکتور احمدخالد حاتم په رهبرۍ او مدیریت، د رهبرۍ او مدیریت په ځانګړتیاوو، ډولونو او اصولو باندې ګډونوالو ته هر اړ خیزه روزنیز پریزنټیشن  وړاندې کړ، نوموړي همدا راز ډاډ څرګند کړ، چې د وخت اړتیاوو ته په کتو سره به په خپلو روزنیزو پروګرامونو او برنامو کې پراخوالی راولي.