د کار چارو مرستیالوزیر د نشهيي توکو پر وړاندې د مبارزې له معین سره وکتل
د کار او ټولنیزو چارو وزارت د کار چارو معين الحاج مولوي محمد زاهد احمدزي د کورنیو چارو وزارت د نشهيي توکو پر وړاندې د مبارزې له معین الحاج شیخ محمدقاسم خالد سره وکتل. په یاده ناسته کې د دواړو اړخونو له لوري په مخدره توکو اخته کسانو د ستونزو، روغتیايي حالاتو، ټولنیزو ستونزو او هغوي ته د فني او حرفوي زده کړو زمينې برابرولو په اړه خبرې وشوې. د کار چارو معين مولوي محمد زاهد احمدزي زیاته کړه: په پنځو زونونو کې له اعتیاد څخه رغېدلو اشخاصو لپاره د فني او حرفوي زده کړو زمينه برابره شوې او په راتلونکي کې به په پاتې زونونو او ولایاتو کې هم له اعتیاد څخه رغېدلو اشخاصو ته هم د فني او حرفوي زده کړو زمینه برابره شي. مولوي احمدزي د خپلو خبرو په دوام کې وویل: اړتیا ده چې د بېکاره ځوانانو لپاره کاري فرصتونه زیات شي، ترڅو د نشهيي توکو له ګواښ څخه وژغورل شي. په پای کې د نشهيي توکو پر وړاندې د مبارزې معین هم د کار او ټولنیزو چارو وزارت له لوري د رغېدلو اشخاصو د ټولنې سره د بیا ځلې ادغام او هغوی ته د فني او حرفوي زده کړو زمينې برابرولو په برخه کې هڅې وستایلې، او ډاډ یې ورکړ چې د دواړو ادارو ترمنځ په همغږۍ ډول به ټولنې ته د مسؤلیتمنونکو افرادو په توګه له اعتیاد څخه رغېدلو اشخاصو بېرته ادغام لپاره به نورې آسانتیاوې هم برابرې شي.
