د کار چارو معین د بامیانو له والي سره وکتل،
د کار او ټولنیزو چارو وزارت معين الحاج مولوي محمد زاهد احمدزي بامیان ولایت ته په خپل رسمي سفر کې د دې ولایت له والي مولوي عبدالله سرحدي سره وکتل.
په پیل کې د بامیانو والي د کار چارو معین او ورسره مل پلاوي ته ښه راغلاست ووایه او ولایتونو ته د مختلفو ادارو د پلاوو ورتګ يې د چارو په شفافيت او ولسونو ته د خدماتو د وړاندې کولو په برخو کې اغیزمن یادکړ. همداراز يې د بامیان ولایت د محلي ادارې د ریاستونو ترمنځ د ښې همغږۍ څخه په یادونې سره د ځينو ټولګټو پروژو، چې دمګړۍ په کې یو شمېر هېوادوال په کارونو بوخت دي هم یادونه وکړه او له محلي ادارې سره یې د بامياني ولسونو نږدې همکاري وستايله.
ورپسې د کار چارو معین الحاج مولوي محمد زاهد احمدزي خپلو خبرو کې د دې ترڅنګ، چې د کار او ټولنیزو چارو وزارت له فعالیتونو یادونه درلوده؛ د کار ملي کانفرانس د موخو او ژمنو تعقیب؛ چې پایله یې په راتلونکي کې د بیکارۍ کچې کمښت او کارموندنه ده؛ د وزارت له لومړیتوبونو وګڼل.
مولوي محمد زاهد احمدزي د خپلو خبرو په دوام وویل: د افغانستان اسلامي امارت په حاکمیت سره په ټول هېواد کې بشپړ امنیت ټینګ او د غوره خدماتو فرصت برابر دی، چې ایجاب کوي ټول مسؤلین خپلو کاري ساحو کې روانې هڅې ګړندۍ کړي، ترڅو له یوې خوا ولسونو ته کاري فرصتونه جوړ او له بلې خوا هېواد ځان بسیاینې ته نږدې شي.
