د کار چارو معین د ملي پراختیا شرکت له مرستیال سره وکتل
د کار او ټولنیزو چارو وزارت د کار چارو معین الحاج مولوي محمد زاهد احمدزي د خپل کار په دفتر کې د ملي پراختیا شرکت د تولید په چارو کې د انسجام او سوداګرۍ له مرستیال ریاضالدین شریفي او نورو استازو سره وکتل.
په پیل کې د ملي پراختیا امارتي شرکت استازو په خپلو خبرو کې د شرکت د لاستهراوړنو، روانو برنامو، راتلونکو پلانونو او ننګونو په اړه معلومات شریک کړل او د ځینو ستونزو د حل په موخه یې د همکاریو غوښتنه وکړه.
ورپسې د کار او ټولنیزو چارو وزارت د کار چارو معین الحاج مولوي محمد زاهد احمدزي د ملي پراختیا شرکت د هلو ځلو د ستایلو سربېره، په خپلو خبرو کې وویل: د کار او ټولنیزو چارو وزارت هڅه کوي، چې خپلو امکاناتو ته په کتو د زېربناوو په جوړولو او ترمیم کې هر ډول ستونزو او ننګونو ته رسېدنه او د حل لپاره یې کوټلي ګامونه واخلي.
همداراز مولوي احمدزي زیاته کړه، چې له همکارو ادارو سره په همغږۍ د اصولو او قوانیو په نظر کې نیولو سره په ګډه د کورنیو او بهرنیو مسلکي او متخصصو کارګرانو په جلبولو او استخدام کې د اسانتیاوو رامنځته کیدو کې به هڅه وکړي، ترڅو په اړوندو برخو کې لازم او اړین سهولتونه برابر شي.
