د کار چارو معین د ناروې د کډوالو شورا له مشر سره وکتل
د کار او ټولنیزو چارو وزارت، د کار چارو معین الحاج مولوي محمد زاهد احمدزي د خپل کار په دفتر کې د ناروې د کډوالو شورا له مشر ښاغلي تاریا مګنوسن واټرډال سره وکتل.
کتنه کې ښاغلي تاریا له دې شورا سره د کار او ټولنیزو چارو وزارت د نږدې همغږۍ څخه په مننې سره څرګنده کړه، چې غواړي د راتلونکو څلورو کلونو لپاره ستراتیژي چمتو او په کې د کار او ټولنیزو چارو وزارت د مهم ستراتیژیک شریک په توګه په پام کې ونیسي نو اړینه ده، چې د دې وزارت سپارښتنې او وړاندیزونه له ځانه سره ولرو ترڅنګ یې د یونیسکو سازمان په مرسته غواړو د ځانګړو حرفو لپاره پر ښوونیزو نصابونو کار وشي، چې دې برخه کې هم له موږ سره خپلې همکاري جاري و ساتئ.
ښاغلي تاریا همداراز څرګنده کړه چې په لنډ وخت کې به خپل متبوع هېواد ته د سفر په ترڅ کې هڅې وکړي، ترڅو اړوند مسوولینو ته قناعت ورکړي، چې مختلفو برخو کې له افغانستان سره مرستې وکړي.
د کار چارو معین الحاج مولوي محمد زاهد احمدزي خپلو خپرو کې مېلمنو ته د ښه راغلاست سربېره، د یادو مواردو په اړه موافقه څرګنده او پرېکړه وکړه، چې د دواړو لورو تخنیکي ټیمونه دې په دې برخو کې له نږدې کار وکړي، ترڅو د یوه ځانګړي میکانیزم له لارې اړونده نظریې او وړاندیزونه شریک؛ له مخې یې په راتلونکي کې د همکاریو ساحه پراخه، مختلفو برخو کې افغان ولسونو ته مناسب او د پام وړ خدمات وړاندې شي.
نننۍ ناسته کې د مهارتونو د پراختیا لوی رئیس، د بهرنیو اړیکو رئیس او د وزارت مقام سلاکار هم ګډون درلود.
