د کار چارو معین د کورنیو چارو وزارت له مرستیال وزیر سره وکتل
د کار او ټولنیزو چارو وزارت؛ د کار چارو معین الحاج مولوي محمدزاهد احمدزي د کورنیو چارو وزارت د امنیتي چارو ستر معینیت مرستیال سترپاسوال مولوي صدر ابراهیم سره وکتل.
د کتنې په پیل کې د کار چارو معین وویل: د کار او ټولنیزو چارو وزارت په هېواد کې د بېکارۍ کچې د راټیټولو مسئولیت لري؛ او په همدې اساس یې د تېر کال د کار ملي کانفرانس جوړ کړ او اوسمهال د هغه د ژمنو پر تعقیب بوخت دی.
مولوي محمدزاهد احمدزي زیاته کړه: هڅه کوو چې له امارتي ادارو او بنسټونو او همدارنګه خصوصي سکتور سره په ګډه همغږۍ او همکارۍ په هېواد کې د بیکارۍ کچه راټیټه کړو؛ چې په دې برخه کې د کورنیو چارو وزارت هلې ځلې نه یوازې د ستایلو وړ دي، بلکې په دې ډګر کې د نورې همکارۍ تمه هم لرو؛ ترڅو په دې برخه کې د ولسونو ستونزې او شکایات له موږ سره شریک کړي او د متخصص بشري ځواک په استخدام کې د کار او ټولنیزو چارو وزارت سره همغږي وکړي.
د کورنیو چارو وزارت د امنیتي چارو مرستیال سترپاسوال مولوي صدر ابراهیم هم په خپلو خبرو کې د کار او ټولنیزو چارو وزارت د هلو ځلو او فعالیتونو د ستایلو سربېره ژمنه وکړه؛ چې په نږدې راتلونکې کې به د کمیت او کیفیت په اساس د خپلو اړتیا وړ خالي بستونو نوملړ د کار او ټولنیزو چارو وزارت سره شریک کړي؛ ترڅو په استخدام کې په تېرو دوو کلونو کې نویو راستانهشویو هېوادوالو ته لومړیتوب ورکړل شي او تر ډیره بریده د نویو راستنېدونکو هېوادوالو له هغو لستونو استخدام وشي؛ چې د کار او ټولنیزو چارو وزارت سره دي.
