راستنېدونکو کډوالو ته د کاري فرصتونو د برابرولو کمېټې نوبتي ناسته ترسره شوه
د کار او ټولنیزو چارو وزارت د کار چارو معین الحاج مولوي محمد زاهد احمدزي په مشرۍ او د اړوندو وزارتونو د استازو په ګډون، بېرته راستنېدونکو کډوالو ته د کاري فرصتونو د برابرولو کمېټې نوبتي ناسته کې، امارتي ادارو سره د کارموندنې په موخه د نږدې ۲ زرو تنو بېرته راستنېدونکو د نومونو او ځانګړنو لېستونه شریک شول.
ناسته کې چې د مهاجرینو او بېرته راستنېدونکو چارو، صنعت او سوداګرۍ، اقتصاد او کرنې، اوبو لګولو او مالدارۍ وزارتونو استازو ګډون درلود؛ څرګنده شوه چې د لېستونو د استولو لړۍ به په راتلونکي کې هم دوام مومي او په دې برخه کې به د امارتي ادارو او خصوصي سکتور د پاملرنې او مرستې غوښتنه کېږي. همداراز څرګنده شوه چې د مسؤلیتونو مطابق به؛ د کار او ټولنیزو چارو وزارت په ټول هېواد کې بېرته راستنېدونکو هېوادوالو ته د فني او حرفوي زدهکړو برنامې پراخوي، د اقتصاد وزارت به د مرستو په جلب او جذب کې هڅې کوي، د صنعت او سوداګرۍ وزارت به د راستنېدونکو سوداګرو د پانګونې په موخه سهولت برابروي، د مهاجرینو او بېرته راستنېدونکو وزارت به د سرپناه په برابرولو او نورو اړوندو برخو کې خپل رول ادا کوي او د کرنې، اوبولګولو او مالدارۍ وزارت به هم د کرنې په برخه کې روزنیز پروګرامونه په لار اچوي.
د ویلو ده چې د کار او ټولنیزو چارو وزارت د کار موندنې کمېټې مشري په غاړه لري او غړې ادارې یې پورته ذکر شوي وزارتونه دي، چې په ناستو کې یې ټول تمرکز بېرته راستنېدونکو کډوالو ته د کارموندنې د فرصتونو برابرول او په دې لاره کې د مشترکو اقداماتو ترسره کول دي.
