له اعتیاد څخه رغېدلو ۸۰۰ تنو ته د فني او حرفوي زدهکړو زمینه برابره شوه
د کار او ټولنیزو چارو وزارت اړوند د پلچرخي د فني او حرفوي زده کړو په مرکز کې له اعتیاد څخه رغېدلو ۸۰۰ تنو ته په پنځو حرفو کې د زدهکړو زمینه برابره شوه.
په همدې مناسبت جوړې شوې غونډې ته د فني او حرفوي زدهکړو د مراکزو د تنظیم رئیس مولوي عبدالواحد فایز راغلو مېلمنو ته د ښه راغلاست سربېره له اعتیاد څخه رغېدلو اشخاصو ته د فني او حرفوي زدهکړو دا برنامه ارزښتناکه وبلله او له هغوی یې وغوښتل، ترڅو له شته فرصت او امکاناتو څخه په لازمه استفاده او خپلو زدهکړو ته پاملرنه وکړي.
ورپسې د کار او ټولنیزو چارو وزارت د کار چارو معین الحاج مولوي محمد زاهد احمدزي په خپلو خبروکې وویل: دا وزارت د خپلو نورو مسؤلیتونو ترڅنګ، له اعتیاد څخه رغېدلو اشخاصو ته د فني او حرفوي زدهکړو د زمینې برابرولو په لړ کې دا دی بیاځلې ۸۰۰ تنو هېوادوالو ته په پنځو (خیاطۍ، بوټګنډلو، بیګګنډلو، د ودانیو برېښنا او د کورنیو برېښنايي توکو د ترمیم) حرفو کې د څلورو نیمو میاشتو لپاره برنامه جوړه کړه، چې موږ او تاسو یې د پرانیستې شاهدان او ګډونوال یو.
د کار چارو معین زیاته کړه چې دا لړۍ نه یوازې په کابل، بلکې په ځینو نورو ولایتونو کې هم دوام لري، چې تراوسه څه باندې شپږ زره تنه له اعتیاد څخه رغېدلي اشخاص له دې برنامو څخه مستفید او د ټولنې د سالمو انسانانو په توګه د خپل کسب او کار مالکان ګرځېدلي دي او دمګړۍ د خپلې کورنۍ د نفقې او سرپرستۍ مسؤلیت په غاړه لري.
په پای کې د کورنیو چارو وزارت د نشهیي توکو د اړتیاوو د کمښت رئیس مفتي عبدالحق مطیع په خپلو خبرو کې په هېواد کې د نشهيي توکو د کښت کمېدل او قاچاق مخنیوی، په ټول هېواد کې په اعتیاد د اخته کسانو راټولول، درملنه او په فني او حرفوي زدهکړو سمبالول یې له نشهیي توکو سره د جدي مبارزې مهمې برخې یادې کړې.
