لوگر کې ۱۲۶ تنه له فني او حرفوي زده کړو فارغ شول
د کار او ټولنیزو چارو وزارت د کار چارو معین الحاج مولوي محمد زاهد احمدزي، لوگر ولایت ته په خپل رسمي سفر کې، د دې وزارت اړوند د فني او حرفوي زده کړو د مرکز څخه د ځوانانو په فراغت غونډه کې گډون او وینا وکړه.
په همدې مناسبت جوړه شوې ناسته کې، چې د لوگر ولایت مرستیال والي او د ځینو نورو ادارو مسؤلینو هم حضور درلود، د کار چارو معین الحاج مولوي محمد زاهد احمدزي په خپلو خبرو کې فارغو ځوانانو ته د مبارکۍ ویلو سربېره وویل: د خوښۍ ځای دی، چې نن د فني او حرفوي زده کړو له مرکز څخه د شاوخوا ۱۲۶ تنو ځوانانو د فراغت شاهدان یو، چې په مختلفو حرفو (نلدوانۍ، د تعمیراتو برېښنا او د موبایل ترمیم) کې تر شپږ میاشتنیو نظري او عملي زده کړو وروسته فارغ او ټولنې ته د ماهرو کاریګرو په توګه وړاندې شول.
د کار چارو معین همدا راز څرگنده کړه، چې دا وزارت د خپلو نورو مسؤلیتونو ترڅنګ، د هېواد په ټولو ولایتونو کې کې ځوانانو ته په مختلفو حرفو کې د فني او حرفوي زدهکړو زمینه برابره کړې او هر کال په زرګونو تنه ځوانان له دې زدهکړو د فراغت سندونه ترلاسه کوي. زموږ تجربو ښودلې ده، چې د دې ځوانانو ډېری برخه اوس د کار بازار کې عملاً دخیل او له دې لارې د خپلو کورنیو نفقه برابروي، چې بې مخینې او ستر اقدام دی او تر یوه حده دې پروسې د بېکارۍ کچې په کمښت کې مثبته اغېزه لرلې ده.
ورپسې د لوگر ولایت مرستیال والي مولوي محمد انور دین پرور د کار چارو معین او مل پلاوي ته د ښه راغلاست ویلو سربېره، د کار او ټولنیزو چارو وزارت له هڅو او فعالیتونو څخه د مننې ترڅنگ په دې ولایت کې، د تر کار لاندې پروژو په اړه معلومات شریک او د وزارت له رهبرۍ څخه یې د دې سیمو خلکو ته د ورته برنامو د لا پراختیا او زیاتوالي غوښتنه وکړه.
په پای کې د لوگر ولایت د کار او ټولنیزو چارو رئیس مولوي محمد حنیف انس په خپله لنډه وینا کې د خپلو فعالیتونو او کړنو په اړه د معلوماتو شریکولو ترڅنگ، په نږدې راتلونکي کې یادو زدهکړو ته د نورو ځوانانو د جذب ډاډ ورکړ.
هېره دې نه وي، چې په دې سفر کې د داخلي تفتیش رئیس ملا شرف الدین شرف، د پلان او پالیسۍ رئیس مولوي محب الله حبیبي، د کار انسټیوټ رئیس شریف الله شرافت، د کار چارو مشاور محمد کريم حنفي او د مطبوعاتو رئیس سمیع الله ابراهیمي د کار چارو د معین ملتیا کوله.
