مسعود الله اوریاخیل د کار او ټولنیزو چارو وزارت د مالي او اداري چارو مرستیا ل په توګه و ټاکل شو.
د کار او ټولنیزو چارو وزارت په وړاندیز او د جمهوري ریاست عالي مقام په منظورۍ مسعود الله اوریاخیل د دې وزارت د مالي او اداري چارو نوي مرستیال په صفت د کار او ټولنیزو چارو سرپرست سید انور سادات له خوا د وزارت کارکوونکو ته ور و پيژندل شو.
په همدې موخه جوړه شوې غونډه کې د کار او ټولنیزو چارو سرپرست سید انور سادات، د شهیدانو او معلولینو په چارو کې د دولت وزیر لعل الدین اریوبي، د ټولنیزو چارو مرستیال غلام حیدر جیلاني، د ملي امنیت شورا مرستیال داکتر جاوید احمد قایم، یو شمیر معینانو، د ملي شورا وکیلانو، رئيسانو او د وزارت کارکوونکو ګډون کړی وه.
غونډه د قران کریم په مبارکو ایتونو پيل شوه او تر ملي سرود وروسته د مالي او اداري چارو مرستیال د ټاکلو په اړه د جمهوري ریاست عالي مقام حکم د وزارت د دفتر رئيس سید حمیدالله سادات له خوا و لوستل شو.
د کار او ټولنیزو چارو سرپرست سید انور سادات، مسعود الله اوریاخیل ته د مبارکۍ ترڅنګ، د مالي او اداري چارو مرستیال په توګه د نوموړي ټاکنه یو پر ځای اقدام یاد کړ او له هغه یې و غوښتل، څو د یاد معینیت په ټوله کې د وزارت له کارکوونکو سره په پوره همغږۍ او همکارۍ خپل کارونه تر سره کړي.
سید انور سادات زیاته کړه، له نیکمرغه ولسمشر، د ځوانانو په تعهد او تخصص باور لري او د ملي یووالي حکومت له پيله تر دې مهاله یې ګڼ شمیر ځوانو کادرونو ته په لوړو پوستونو کې د خدمت چانس ور کړی دی.
د کار او ټولنیزو چارو سرپرست وویل: په ټیمي کار باورمند یم، هیوادوال له پخوا لا زیات اوس د کار او ټولنیزو چارو څخه توقع لري، ځکه دغه وزارت د ټولنې مختلفه متضرره قشرونو ته خدمتونه وړاندې کوي، هڅه باید کوو، څو دغه خدمتونه لا زیات او ښه کړو؛ د کار ملي کنفرانس څخه چې تیر کال جوړ شو، ښه پایله مو تر لاسه کړه( د کار ملي کنفرانس ۸۰ سلنه هوکړو تحقق موندلی) او په پام کې ده، په نږدې راتلونکي کې د ټولنیز خوندیتوب ملي کنفرانس هم جوړ کړو.
د مالي او اداري چارو نوي مرستیال مسعود الله اوریاخیل د جمهوري ریاست عالي مقام او وزارت رهبري هیئت څخه پر ده د اعتماد او د یاد معینیت د دروند مسؤلیت ور سپارلو په اړه مننه و کړه، ژمنه یې و کړه، چې په پوره صداقت او ایماندارۍ به خپل کاري ټیم سره د وزارت مالي او اداري چارو پر مخ یوسي.
مسعود الله اوریاخیل د خپلو خبرو په ترڅ کې، د وزارت د عادي او پراختیایي بودجې ښه مصرف، د مرکز او ولایتونو په سطحه د بودجې متوازن ویش، د وزارت د عوایدو ټولولو چټکتیا، د استخدام برخه کې اصلاحات او د الکترونیکي حکومت دارۍ تطبیق د خپلو کارونو له لومړیتوبونو څخه یاد کړل.
د ویلو دی، چې مسعود الله اوریاخیل، امریکایي پوهنتون کې زده کړې کړي او له دې وړاندې یې د کار او ټولنیزو چارو وزارت د تدارکاتو رئیس په صفت دنده پر مخ وړله.
