ننګرهار کې ۵۹۰ تنو یتیمو او بېسرپرستو ماشومانو ته البسه او قرطاسیه توکي ووېشل شول
د ننګرهار ولایت د کار او ټولنیزو چارو ریاست په هڅو او همغږۍ؛ د خوږکور روزنتون؛ ۵۹۰ تنه یتیمو او بېسرپرستو ماشومانو ته د اووه سوه زره افغانیو په ارزښت البسه؛ جامې، څادر، بوټان، جرابې، د ښوونځي بکسې او قرطاسیه توکي ووېشل شول.
په همدې مناسبت جوړې شوې غونډې ته د کار او ټولنيزو چارو رئیس مولوي فریدالله حقاني په خپلو خبرو کې د اسلامیک ریلیف له همکاریو د مننې سربېره وویل: د افغانستان اسلامي امارت په ځانګړې توګه د کار او ټولنيزو چارو وزارت هڅه کوي؛ چې د هېواد په ټولو ولایتونو کې د اړمنو، شاقهکارو، د سرک پرمخ کارګرو، یتیمو او بېسرپرستو ماشومانو لاسنیوی وکړي او تر ډېره بریده ورته د ژوندانه سهولتونه برابر کړي.
نوموړي د خپلو خبرو په دوام د ژمي په راتګ سره له ټولو ملي او نړیوالو موسساتو او خیریه بنسټونو څخه د ورته مرستو او همکاريو غوښتنه وکړه، ترڅو خپل فعاليتونه ګړندي او د بېوزلو ماشومانو ملاتړ وکړي.
