پروان ولایت کې ۱۲۰ تنه ځوانان له فني او حرفوي زدهکړو فارغ شول
د کار او ټولنیزو چارو وزارت معین د کار چارو معین الحاج مولوي محمد زاهد احمدزی د یوه پلاوي په مشرۍ، پروان ولایت ته په خپل رسمي سفر کې له فني او حرفوي زدهکړو څخه د ځوانانو په فراغت غونډه کې د ګډون او وینا سربېره؛ پر هغوی د فراغت سندونه ووېشل.
په پیل کې د پروان ولایت د کار او ټولنیزو چارو رئیس مولوي قدرت الله ذاکر، له کابل څخه راغلي پلاوي ته د ښه راغلاست ترڅنګ، د وزارت رهبرۍ له پاملرنې څخه مننه وکړه، چې د دې ولایت د فني او حرفوي زدهکړو د مرکز او د یتیمو او بېسرپرسته ماشومانو د ساتنې په موخه یې د روزنتون سهولتونه برابر کړيدي.
ورپسې، الحاج مولوي محمد زاهد خپله وینا کې وویل: له نېکمرغه د پروان ولایت ۱۲۰ تنه ځوانان د کمپیوټر د مهارتونو، د مبایل ترمیم او د خیاطۍ له حرفې څخه د شپږو میاشتنیو نظري او عملي زدهکړو وروسته فارغ او د مسؤلو اشخاصو په توګه د ټولنې خدمت ته وړاندې شول، همداراز په پام کې ده، چې په نږدې راتلونکي کې به نور ځوانان هم یادو زدهکړو ته جذب شي.
مولوي محمد زاهد د خپلو خبرو په دوام زیاته کړه: د کار او ټولنیزو چارو وزارت د بیکارۍ کچې کمښت په منظور مختلفو برخو کې فعالیتونه ترسره کوي او هم دې ته ژمن دی، ترڅو د کار ملي کانفرانس ژمنې، چې موخه یې په راتلونکي کې د بیکارۍ ستونزې ته رسېدنه؛ هېوادوالو ته کارموندنه او په ټوله کې د هېواد ځان بسیاینه ده، تعقیبوي.
په همدې ترتیب د پروان مرستیال والي مفتي محمد ادریس انوري د کار او ټولنیزو چارو وزارت له هڅو څخه په مننې سره وویل: د افغانستان اسلامي امارت په بیاځلې حاکمیت سره اقتصاد محوره او بنسټیزو پروژ ته لومړیتوب ورکړل شوی او اوسمهال د هېواد په مختلفو سیمو کې ګڼې مهمې او ملي پروژې د تطبیق په حال کې دي، چې په بشپړېدو سره به یې تر ډېره بریده د کار د نشتون ستونزه حل او په پراختیايي برخه کې به د پام وړ بدلون راولي. نوموړي همداراز د کاپیسا ولایت د نساجۍ او د پروان ولایت د سمنټو د تولید د فابریکو، چې په اړه یې ځیني پرمختګونه هم شويدي، د بیاځلې فعالیت په اړه یې د مسؤلینو د پاملرنې غوښتنه وکړه.
په پای کې د کار چارو معین او د نورو مسؤلینو له لوري پر فارغو شویو ځوانانو د فراغت سندونه توزیع او په راتلونکي کې ورته د لابریاوو هیله مندي وشوه
