په تېر یو کال کې له فني او حرفوي زدهکړو څخه څه باندې ۴۰۰۰۰ تنه ځوانان فارغ شوي دي
دا خبره د کار او ټولنیزو چارو وزارت د کار چارو معین الحاج مولوي محمد زاهد احمدزي له فني او حرفوي زدهکړو له یو خصوصي مرکز څخه د ۱۲۸ تنه ځوانانو په فراعت غونډه کې وکړه.
یادو ځوانانو په ګرافيکډیزاین، وېبډیزاین او د موبايل ترمیم په برخو کې د شپږ میاشتنیو نظري او عملي زدهکړو وروسته فارغ او د ۸۳۲۰۰۰ افغانیو په ارزښت د اړوندو حرفو کاري وسایل ترلاسه او تصدیقپانې پرې ووېشل شوې.
په همدې مناسبت جوړې شوې د فراغت غونډې ته د کار چارو معین الحاج مولوي محمد زاهد احمدزي په خپلو خبرو کې فارغ شویو ځوانانو ته د مبارکۍ سربېره وویل: د خوښۍ ځای دی، چې نن د هيلو ټولنیز خصوصي مرکز (Hope Community Center) د فني او حرفوي زدهکړو له پروګرام څخه د ډېرو ځوانانو د فراغت شاهدان یو.
مولوي احمدزي د خپلو خبرو په دوام زیاته کړه، د کار او ټولنيزو چارو وزارت هڅه کوي، چې د کار بازار اړتیاوو ته په کتو هېوادوالو ته د فني او حرفوي زدهکړو زمینه برابره کړي، ترڅو په هېواد کې د بېکارۍ کچه تر یوه بریده راټيټه شي.
همداراز مولوي احمدزي له فارغ شویو ځوانانو څخه وغوښتل، چې له ترلاسه شویو زدهکړو، تجربو او مهارتونو څخه غوره استفاده وکړي ترڅو خپلو کورنیو ته د حلالې نفقې د پيداکولو سبب وګرځي.
ورپسې د مهارتونو د پراختیا لوی رئیس مولوي رحیمالله صراح هم په خپلو خبرو کې د فني او حرفوي زدهکړو د ارزښت ترڅنګ فارغ شویو ځوانانو ته وویل: په عصري او پرمختللي ډول خپلو حرفوي زدهکړو ته پراختیا ورکړئ، ترڅو د کار بازار له بدلېدونکو اړتیاوو سره ځانونه عیار او وکولی شئ په وړتیا، مهارت او نوښت سره د کار په ډګر کې اغېزمن حضور ولرئ.
په پای کې د هیلو ټولنیز مرکز عمومي مدیر امینالله کاموي په خپلو خبرو کې د کار او ټولنیزو چارو وزارت له تلپاتې همکاریو څخه د مننې او ستاینې ترڅنګ زیاته کړه: موږ هڅه کوو، چې له یاد وزارت سره په همغږۍ خپلو فعالیتونو ته پراختیا ورکړو او په نږدې راتلونکې کې به ۱۵۰ تنو نورو ځوانانو ته هم د فني او حرفوي زدهکړو زمینه برابره کړو.
