په قانوني توګه له هېواده بهر د کاریګرو د لېږد او د غیرقانوني تګ د مخنیوي په لارښودونو بحثونه وشول
د کار او ټولنیزو چارو سرپرست وزیر الحاج ملا عبدالمنان عمري په مشرۍ او د مختلفو وزارتونو د مسؤلینو په ګډون، په قانوني توگه له هېواده بهر د کاریګرو د لېږد او د غیرقانوني تګ د مخنیوي په لارښودونو بحثونه او خبرې وشوې.
ناسته کې د کار او ټولنیزو چارو وزارت سرپرست مېلمنو ته د ښه راغلاست ويلو سربېره، څرګنده کړه: له هېواده بهر د افغان کاري ځواک د غیرقانوني تګ په مخنیوي سره کیدلای شي، چې کارګرمنونکو هېوادونو سره د قانوني اعزام موضوع په جدي توګه تعقیب او ورته زمینه برابره شي، چې په دې برخه کې ځیني پرمختګونه هم ترسره شوي دي.
الحاج ملا عبدالمنان عمري د خپلو خبرو په دوام وویل: د مختلفو وزارتونو او ادارو له لوري پورته ذکر شوي لارښودونه چمتو شوي، چې په نهايي کېدو او تطبیق سره به يې تر ډېره بريده د کاریګرو لپاره سهولتونه برابر شي.
ناسته کې د اطلاعاتو او کلتور وزارت معين مولوي قدرت الله جمال هم خپله وینا کې د لارښودونو د چمتو کېدو څخه خوښي څرګنده او په دې برخه کې د همکاریو ډاډ ورکړ.
په همدې توګه د ناستو نورو ګډونوالو نظرونه هم شریک او د خپلو ادارو له لوري یې د همکاریو ژمنې وکړې.
په پای کې پرېکړه وشوه، چې د ذیدخله ادارو له استازو څخه یو کمېټه جوړه او د دې لارښودونو د بډاینې لپاره دې په مشترک ډول کار وکړي او تر بشپړېدو وروسته دې بلې ناستې ته وړاندې کړي.
نننۍ ناسته کې د بهرینو چارو، عدلیې، کورنیو چارو، عامې روغتیا، د اطلاعاتو او کلتور، د ار شاد، حج او اوقافو وزارتونو او د احصایې او معلوماتو ملي ادارې با صلاحیته استازو ګډون کړی وو.
