پکتیکا ولایت کې د رغیدلو معتادیتو لپاره د فني او حرفوي زدهکړو مرکزونه پرانیستل شول
د پکتیکا ولایت په مرکز شرنه او ارګون ولسوالۍ کې د اعتیاد څخه رغېدلو افرادو لپاره د فني او حرفوي زدهکړو دوه مرکزونه پرانیستل شول، چې په هغو کې به د خیاطۍ، ترکاڼۍ او برښنا په برخو کې رغیدلو معتادینو ته مسلکي زدهکړې ورکول کیږي.
د یادو مرکزونو د پرانیست مراسمو کې د کار او ټولنیزو چارو رئیس مولوي دولت خان فایز سربیره، د ریاست ځینو کارکوونکو او استادانو، او د یوشمېر ولایتي ادارو او د همکارې مؤسسې استازو هم ګډون درلود.
د پکتیکا ولایت د کار اوټولنیزو چارو رئیس مولوي دولت خان فایز خپلو خبرو کې وویل: د خوښۍ ځای دی چې د اعتیاد څخه رغېدلو اشخاصو ته د فن او حرفو د زدهکړو زمینه برابره او په دې برخه کې له KRO مؤسسې سره هوکړهلېک لاسلیک شو،. چې دا چاره به وکولای شي ترڅو رغیدلي معتادین د سالمو وګړو په توګه ټولنه کې بیاځلې یوځای او د خپلو کارونو مالکان وګرځي.
مولوي فایز له همکارې مؤسسې وغوښتل چې د پکتیکا ولسونو ته د خدماتو وړاندې کولو کې خپله همکاري پراخه او خپل فعالیتونه دې د کار اوټولنیزو چارو ریاست سره په همغږۍ ترسره کړي، په همدې توګه یې له ګډونوالو هم غوښتنه درلوده چې له شته فرصت څخه اعظمي ګټه واخلي، ترڅو په راتلونکي کې د ماهر و کارګرو په توګه د کار بازار کې شامل شي.
