کابل کې ۱۴۰ تنه ځوانان له فني او حرفوي زدهکړو فارغ شول
د کار او ټولنیزو چارو وزارت؛ اړوند د مهارتونو د پراختيا لوی ریاست په هڅو او همغږۍ ۱۴۰ تنه ځوانان؛ د کابل ښار د فني او حرفوي زدهکړو له مرکز څخه فارغ او تصديقپاڼې ترلاسه کړې.
په همدې مناسبت جوړې شوې فراغت غونډې ته د کار او ټولنیزو چارو وزارت د کار چارو معین الحاج مولوي محمدزاهد احمدزي په خپلو خبرو کې فارغشویو ځوانانو ته د مبارکۍ سربېره وویل: د خوښۍ ځای دی، چې د کابل ښار د فني او حرفوي زدهکړو له مرکزه ۱۴۰ تنو ځوانانو د فراغت شاهدان یو، چې په نلدوانۍ، د تعمیراتو برېښنا، فلزکارۍ او خياطۍ حرفو کې تر شپږ میاشتنیو نظري او عملي زدهکړو وروسته دوی ټولنې ته د ماهرو او نیمهماهرو کاریګرو په توګه ټولنې او د کار بازار ته وړاندې کیږي، چې په دې سره به وکولي شي خپلو کورنیو ته حلاله نفقه پیدا او د ځانبسیاینې په لور ګام واخلي.
همداراز د کار چارو معین څرگنده کړه، چې دا وزارت د خپلو نورو مسؤلیتونو ترڅنګ، د هېواد په ټولو ولایتونو کې ځوانانو، له اعتیاد څخه رغېدلو کسانو، زیانمنو، یتیمو او بېسرپرسته ماشومانو او معلولو مجاهدینو ته په بېلابېلو برخو کې د کار بازار اړتياوو ته په کتو د فني او حرفوي زدهکړو زمینه برابروي، چې په دې سره به تر ډیره بریده د په هېواد کې د بېکارۍ کچې په راټیټیدو کې مثبته اغېزه ولري.
مولوي احمدزي د خپلو خبرو په دوام زیاته کړه، چې بېکاري د خلکو یو له جدي ستونزو څخه ده او د هغې پر وړاندې د مبارزې په موخه، د افغانستان اسلامي امارت، په ځانګړي ډول د کار او ټولنیزو چارو وزارت هڅه کوي چې هېوادوالو ته د کاري فرصتونو زمینه برابره کړي.
په پای کې د کار چارو معین له هېواده بهرو پانګوالو ته په خطاب کې وویل د ا.ا.ا په راتګ سره په هېواد کې د پانګونې لپاره زمينه برابره شوې، چې د پانګونې له لارې به د بېکارۍ کچه تر ډېره بریده راټيټه او ګن شمېرهېوادوالو به په بازار کې د کار څښتن شي .
د یادولو وړ ده، چې په یاده فراغت غونډه کې د مهارتونو د پراختیا لوی رئیس مولوي رحیمالله صراح، د فني او حرفوي زدهکړو د تنظیم رئیس مولوي عبدالواحد فایز، د کار چارو مشاور قاري محمد کریم حنفي، او همداراز د یاد مرکز استادانو، زدهکوونکو او مسئولینو هم حضور درلود.
