کابل کې ۱۴۱ تنه ځوانان له فني او حرفوي زده کړو فارغ شول
د کار او ټولنیزو چارو وزارت؛ اړوند د مهارتونو د پراختيا لوی ریاست په هڅو او همغږۍ؛ ۱۴۱ تنه ځوانان؛ د عصر نوین د فني او حرفوي زدهکړو له مرکز څخه په خیاطۍ، تعمیراتو برېښنا، کمپیوټر او فلزکارۍ حرفو کې تر شپږ میاشتنیو نظري او عملي زدهکړو وروسته فارغ او تصديقپاڼې ترلاسه کړې.
په همدې مناسبت جوړې شوې فراغت غونډې ته د کار او ټولنیزو چارو وزارت د مهارتونو د پراختيا لوی رئیس مولوي رحيمالله صراح په خپلو خبرو کې فارغ شویو ځوانانو ته د مبارکۍ سربېره وویل: د خوښۍ ځای دی، چې نن د عصر نوین د فني او حرفوي زده کړو له مرکزه ۱۴۱ تنو ځوانانو د فراغت شاهدان یو، چې ټولنې ته به د ماهرو او مسلکي کاریګرو په توګه وړاندې کېږي، چې په دې سره به دوی وکولی شي خپلو کورنیو ته حلاله نفقه پیدا کړي.
همداراز نوموړي زیاته کړه، د کار او ټولنيزو چارو وزارت هڅه کوي، چې په هېواد کې د بېکارۍ کچه راټيټولو او د کار بازار اړتياوو ته په کتو هېوادوالو ته په بېلابېلو برخو کې د فني او حرفوي زدهکړو زمینه برابره کړي.
ورپسې، د فني او حرفوي زدهکړو د تنظیم رئیس مولوي عبدالواحد فایز هم په خپلو خبرو کې د کسب او کار پر ارزښت ټینګار وکړ او له فارغ شویو ځوانانو یې غوښتنه وکړه، چې له خپلو تر لاسه شویو زدهکړو، مهارتونو او تجربو څخه مثبته ګټه واخلي، ترڅو د خپل هېواد او خپلو کورنیو لپاره د خدمت مصدر وګرځي.
د یادولو وړ ده، چې په یاده فراغت غونډه کې د کار چارو مشاور قاري محمد کریم حنفي، د فني او حرفوي زدهکړو د انسجام او همغږۍ رئیس ملا عبدالغني وفا، د مطبوعاتو رئیس سمیعالله ابراهيمي، د یاد مرکز استادانو، زدهکوونکو او مسئولینو هم حضور درلوده.
