کونړ کې ۲۹۹ تنه یتیمو او بېسرپرسته ماشومانو ته ژمني کیټونه ووېشل شول
د کونړ ولایت د کار او ټولنیزو چارو ریاست په هڅو او همغږۍ؛ د یاد ولایت له بېلابېلو ولسوالیو څخه ۲۹۹ تنه یتیم او بېسرپرسته ماشومانو ته ژمني کیټونه؛ کمپلې، جامې او جمپر چې مجموعي ارزښت یې د ۱۱۹۶۰۰۰ افغانۍ کېږي ووېشل شول.
په همدې مناسبت جوړې شوې غونډې ته د کونړ ولایت د کار او ټولنیزو چارو ریاست استازي په خپلو خبرو کې د همکارې اُمه خیریه موسسې څخه د مننې سربېره وویل: اړینه ده، چې په هېواد کې د اړمنو، د سړک پرمخ کاریګرو، یتیمو او بېسرپرسته ماشومانو لاسنیوی او ملاتړ وشي او هغوی ته تر یوه بریده د ژوندانه سهولتونه برابر شي.
همداراز یې د خپلو خبرو په دوام له ملي او نړیوالو موسساتو او خیریه مرستندویو بنسټونو څخه وغوښتل، چې د ژمي سړې هوا په را رسیدو سره هممهاله، خپل فعالیتونه پراخ کړي.
