د کار او ټولنیزو چارو وزارت د کار مرستیال سره د افغانستان لپاره د کار نړیوال سازمان مشر لیدنه
کابل: ۲۳ سرطان ۱۴۰۰
د کار معینیت مرستیال عبدالغفور ملکزي د افغانستان لپاره د کار نړیوال سازمان مشر سره خپل کاري دفتر کې و کتل.
دې ناسته کې د ښه کار ملي پروګرام، د یاد پروګرام لومړیتوبونو او موخو، د ښه کار نړیوالوستندردونو او پراختیا، د کار بازار مدیریت او ارزونې، د کورنیو بې ځایه شویو ګډوالو ظرفیت لوړولو، د روغتیایي او خوندیتوب پالیسۍ پلي کولو، د کار پلټنې پالیسۍ تطبیق او ټولنیزو شریکانو ظرفیت لوړولو موضوعاتو اړوند خبرې و شوې.
پيل کې د افغانستان لپاره د کار نړیوال سازمان مشر رامین بهزاد د ښه کار ملي پروګرام (۲۰۱۸ تر ۲۰۲۲) اړوند خبرې و کړې و یې ویل، چې یاد پروګرام د دریوو پروژو( د کار نړیوالو ستندردونو پراختیا او ترویج، د ټولو لپاره د ښه کار واټ (د کارموندنې لپاره د فن او حرفې څخه ملاتړ کوي) او همدارنګه په هیواد کې د ماشومانو کار څخه مخنیوی) څخه جوړ شوی دی.
وروسته د کار مرستیال عبدالغفور ملکزي د خپلو خبرو په ترڅ کې د کار نړیوال سازمان له مرستو او د ښه کار ملي پروګرام ښه پلي کېدو څخه د مننې تر څنګ زیاته کړه: د کار او ټولنیزو چارو وزارت د ټولنیزو شریکانو، کار نړیوال سازمان، دولت او ډونرانو تر منځ د ښې همغږۍ غوښتونکی دی؛ نوموړي ژمنه یې و کړه، چې د کار نړیوال سازمان سره به د یو ښه شریک په توګه همکاري و کړي.
د ویلو دی، چې د ښه کار ملي پروګرام ۲۰۱۸ کال کې پيل او تر ۲۰۲۲ کال پورې به دوام و کړي، چې زیات ټینګار یې په افغانستان کې د کار عالي شورا په جوړیدو، د کار نړیوالو ستندردونو ترویج او کارګرانو حقوقو ښه خوندیتوب دی.
