کونړ کې ۲۴۰ تنه ځوانان له حرفوي زدهکړو فارغ شول
د کونړ ولایت د کار او ټولنیزو چارو ریاست په هڅو، د دې ریاست اړوند د فني او حرفوي زدهکړو له مرکز څخه ۲۴۸ تنه ځوانان د خیاطۍ او د چرګانو روزنې په حرفو کې تر شپږ میاشتنیو عملي او نظري زدهکړو وروسته فارغ شول.
په همدې مناسب جوړه شوې غونډه کې، چې د ولایت مختلفو اداري مسؤلینو، علمای کرامو، قومي مشرانو او د فارغو شویو د کورنیو غړو حضور درلود، د کونړ مرستیال والي مولوي عبدالله حقاني په خپلو خبرو کې وویل: د افغانستان اسلامي امارت هڅه کوي، چې په مختلفو برخو کې خپلو هېوادوالو ته غوره کاري فرصتونه او د ښه ژوندانه سهولتونه برابر کړي.
مولوي عبدالله همدا راز د سترو ملي پروژو پیل د هېواد په اقتصادي پرمختګ او د بېکارۍ کچې را ټیټولو په برخه کې مهم ګامونه وګڼل او ځوانانو ته یې د ورته روزنیزو پروګرامونو د لا زیاتوالي غوښتنه وکړه.
ورپسې د کونړ ولایت د کار او ټولنیزو چارو رئیس مولوي مجیب الله عمر په خپلو خبرو کې فارغو شویو ځوانانو ته د مبارکۍ سربېره وویل: له نېکمرغه، نن د کونړ ۲۴۸ تنه ځوانان د خیاطۍ او چرګانو روزنې حرفو له شپږ میاشتنينو عملي او نظري زدهکړو وروسته د کار بازار ته د حرفوي کسانو په توګه وړاندې شول، او هغوی ته د همکارو مؤسسو په مرسته په اړونده حرفو کې کاري وسایل هم وویشل شول.
مولوي عمر همدارنګه له فارغو شویو ځوانانو وغوښتل، چې په اړوندو حرفو کې خپلو کورنیو او ولسونو ته د ګټورو خدماتو وړاندې کولو سبب وګرځئ
