د کونړ په ولایت کې څلور نیم سوه تنه له فني او حرفوي زدهکړو فارغ شول
د کونړ ولایت د کار او ټولنیزو چارو ریاست په هلو ځلو د مبایلجوړونې، ترکاڼۍ او غالۍاوبدنې په حرفو کې د مرکز اسعدآباد په ګډون،په وټهپور او غازيآباد ولسوالیو کې ۴۵۰ تنه له شپږ میاشتنیو حرفوي زدهکړو فارغ او هر یو ته د ۶ میلیونه افغانیو په ارزښت په اړونده حرفه کې د کاروبار لپاره کاري وسایل ووېشل شول. هغې غونډې ته؛ چې په همدې مناسبت جوړه شوې وه، د کونړ ولایت مرستیال والي مولوي عبدالله حقاني وویل: په ټولنه کې د مسلکي او ماهرو کاریګرو روزل او هغوی ته د کار زمینه برابرول خپل مسوولیت بولو، ترڅو خپلو کورنیو ته حلال رزق وګټي. د کار او ټولنیزو چارو رییس مولوي مجیبالله عمر هم په خپلو خبرو کې وویل: خوښ یم چې هر فارغ شوي مسلکي کارګر ته د کاري وسایلو ترڅنګ، د کار د پیل لپاره ۶۴۰۰ افغانۍ نقدي مرسته هم ویشل کیږي. مولوي مجیبالله عمر زیاته کړه: اسلامي امارت د بېکارۍ او فقر راکمولو ته زیاته پاملرنه کړې او هڅه داده چې د کاري فرصتونو پر مټ د فقر او بېکارۍ کچه راټیټه شي. د یادونې وړ ده، چې یاد شمیر ځوانان د خوړو نړیوال سازمان په مالي ملاتړ د شپول مؤسسې له لوري فني او حرفوي زدهکړې ترلاسه کړي
