د کار ملي کانفرانس د ژمنو د تعقیب په موخه د ملي پراختیا شرکت له رئیس سره د همغږۍ ناسته وشوه
د کار او ټولنیزو چارو وزارت د کار چارو معین الحاج مولوي محمد زاهد احمدزي د کار ملي کانفرانس د ژمنو د تعقیب په موخه، د ملي پراختیا امارتي شرکت له رئیس عبدالرحمن عطاش سره وکتل.
کتنه کې د کار چارو معین په مختلفو برخو کې د ملي پراختیا امارتي شرکت هلو ځلو او پروژو د ستایلو سربېره زیاته کړه: د کار ملي کانفرانس یو له عمده موخو څخه په راتلونکو پنځو کلونو کې نږدې یو نیم میلیون هېوادوالو ته په مستقیم او غیر مستقیم ډول د کاري زمینو اېجاد وو، چې په کې د ملي پراختیا امارتي شرکت هم یو زیات شمېر هېوادوالو ته د کارموندنې د فرصتونو د برابرولو ژمنه کړې ده او غواړو له ټولو ادارو سره د ترسره شویو هوکړهلیکونو مطابق، د کانفرانس له پای ته رسېدو وروسته د بشري ځواک په استخدام کې د هغوی د اجراآتو څخه ډاډ ترلاسه او خپلو ولسونو ته معلومات ورکړو، چې په دې موده کې کوم شمېر هېوادوالو ته په کومو برخو کې د کار زمینه برابر شوې ده.
ورپسې د ملي پراختیا امارتي شرکت رئیس عبدالرحمن عطاش وویل: دا زمونږ دنده او مسؤلیت ده، چې د کار او ټولنیزو چارو وزارت سره په همغږۍ مسلکي کاریګرو ته په مختلفو برخو کې د کار زمینه برابره کړو ترڅو په هېواد کې د بېکارۍ کچه راټیټه شي.
همداراز نوموړي د خبرو په دوام وویل: هېواد کې بشپړ امنیت ټینګ او په بیلابېلو برخو کې لویې او ملي پروژې تر کار لاندې دي؛ چې د استخدام او کارموندنې په برخو کې مثبتې او د پام وړ لاستهراوړنې لرلي، خو فقر او بېکاري اوس هم د خلکو له اساسي ستونزو څخه دي، چې باید ټول په مشترک ډول خپل مسؤلیتونه ترسره او فعالیتونه ګړندي کړو، ترڅو په دې برخو کې هم پرمختګونه پراخ شي او هم به په اقتصادي برخه کې بدلون رامنځته کړي. همداراز یې په خپلو خبرو کې زیاته کړه، چې د کار په ملي کانفرانس کې د ترسره شوې ژمنې د عملي کېدو لپاره اقدام شوی او په دې اړه به لازم معلومات د کار او ټولنیزو چارو وزارت سره شریک کړو.
