کابل کې ۲۱۶ تنه اړمنو او بېوزله کسانو ته کاري وسایل ووېشل شول
د کار او ټولنیزو چارو وزارت په هڅو او همغږۍ؛ د کابل په شکردرې ولسوالۍ کې ۲۱۶ تنه اړمنو او بېوزله کسانو ته، چې د ځانګړې سروې په ترڅ کې تشخیص شوي وو د کوچنيو کاروبارونو د زمينې برابرولو په موخه د خیاطۍ، بوټګنډلو، دوکاندارۍ، نلدوانۍ، فلزکارۍ، پنچرمینۍ، ټوکرپلورني او مالدارۍ) په حرفو کې تر ځانګړو زدهکړو وروسته کاري وسایل ووېشل شول.
په همدې مناسبت جوړه شوې غونډې ته د کار چارو معین الحاج مولوي محمد زاهد احمدزي په خپلو خبرو کې وویل: د کار او ټولنیزو چارو وزارت ژمن دی، چې د ټولنې بېلابېلو ډلو، په ځانګړې ډول اړمنو او بېوزلو کسانو لاسنیوی وکړي او هغوی ته د کوچنیو کاروبارونو زمینه برابره کړي، ترڅو دوي وکولي شي چې خپلو کورنیو ته حلاله نفقه پېدا کړي.
همداراز مولوي احمدزي له همکارې مؤسسې سرف افغانستان څخه دمننې سربېره له نورو همکارو مؤسساتو څخه هم غوښتنه وکړه، چې په خپلو فعالیتونو کې پراخوالی راولي، ترڅو په ټولنه کې د بېکارۍ کچه راټيټه او هېوادوالو ته په مختلفو برخو کې د کاري فرصتونو زمینه برابره او شته ستونزې حل شي.
ورپسې د شکردرې ولسوال مولوي فدا محمد فدايي هم په خپلو خبرو کې راغلو میلمنو ته د ښه راغلاست سربېره له مستحقینو څخه غوښتنه وکړه، چې له ترلاسه شویو وسایلو او توکو څخه په غوره توګه ساتنه او استفاده وکړی.
په پای کې د سرف افغانستان همکارې مؤسسې استازي هم په خپلو خبرو کې د کار او ټولنیزو چارو وزارت او یادې ولسوالۍ د مسؤلینو له همکاريو څخه مننه وکړه او زیاته کړه؛ دا زمونږ هڅه ده ترڅو د خپلو هېوادوالو لپاره د ځانبساینې، دعاید پیدا کولو او د اقتصادي ثبات زمینه برابره کړو او په وخت سره یې ستونزو ته رسېدنه وکړو.
د یادولو ده، چې په غونډه کې د مهارتونو د پراختیا لوی رئیس مولوي رحیمالله صراح او د فني او حرفوي زدهکړو د مراکزو د تنظیم رئیس مولوي عبدالواحد فایز هم حضور درلود.
