د کار چارو معین لغمان ولایت ته رسمي سفر وکړ
د کار او ټولنيزو چارو وزارت، د کار چارو معین الحاج مولوي محمد زاهد احمدزي د یوه پلاوي په مشرۍ لغمان ولایت ته په خپل سفر کې د دې ولایت له والي سره ولیدل. کتنه کې دواړو لوریو د دې ولایت په کچه د روانو پراختيايي پروژو، په پروژو کې خلکو ته د کارپنځونې، مختلفو برخو کې د خدماتو د وړاندې کولو په څرنګوالي، د دې ولایت ځوانانو ته د فني او حرفوي زدهکړو د پراختیا، د یتیمو او بې سرپرستو ماشومانو څخه د ملاتړ، پانګهوالو ته د زمینو د برابرېدو او له خپل نظام سره د ولسونو له نږدې همکاریو په اړه بحثونه او خبرې وکړې. د لغمان والي، قاري بختیار معاذ د کار چارو معین او ورسره مل پلاوي ته د ښه راغلاست سربېره؛ مختلفو برخو کې د دې ولایت د محلي ادارو له لوري د خدماتو د وړاندې کولو په اړه معلومات شریک او په دې برخو کې یې د لا ډېر پاملرنې ډاډ ورکړ. د یادولو ده چې د معینیت سلاکار مولوي محمد کریم حنفي او د مطبوعاتو رئیس سمیع الله ابراهیمي، په دې سفر کې د کار چارو د معین ملتیا لري.
