د ټولنیزو چارو معين د افغانستان ملي راډیو تلویزیون له رئیس سره وکتل
د کار او ټولنیزو چارو وزارت؛ د ټولنیزو چارو معین الحاج مولوي عبیدالله امینزاده او ورسره مل پلاوي د افغانستان ملي راډیو تلویزیون د لوی ریاست له عمومي رئیس قاري محمد یوسف احمدي سره وکتل.
د ناستې په پیل کې د ټولنیزو چارو معین وویل: د افغانستان ملي راډیو تلویزیون د دولت رسمي رسنیز بنسټ دی، چې کولای شي د راډیو او تلویزیون له لارې په مرکز او ولایاتو کې له خپلو کورنیو څخه د ورک شوو ماشومانو په پیدا کولو، د هغوی په اړه د اعلاناتو په خپرولو، د ټولنیزو برنامو په جوړولو او انعکاس، له زیان سره د مخ اقشارو او په ځانګړې توګه د ماشومانو په اړه د عامه پوهاوي له لارې د خلکو او دولت ترمنځ د اړیکو په پیاوړتیا کې مهم رول ولوبوي.
مولوي عبیدالله امینزاده د ملي راډیو تلویزیون له رئیس څخه وغوښتل چې له کورنیو څخه د ورکو شویو ماشومانو په بېرته یوځای کېدو او د عامه پوهاوي برنامو په خپرولو کې د کار او ټولنیزو چارو له وزارت سره خپلې همکارۍ پراخې کړي.
ورپسې د ملي راډیو تلویزیون لوی رئیس ډاډ څرګند کړ، چې د افغانستان ملي راډیو تلویزیون د کار او ټولنیزو چارو وزارت د ټولینزو پروګرامونو سره هر ډول همکارۍ ته چمتو دی, ترڅو په ټولنه کې له زیان سره د مخ ټولو اقشارو ستونزې او ننګونې هېوادوالو سره شرېکې شي او په یاد ډګر کې د هغوی همکارۍ او مرستې را جلب کړي.
په پای کې د دواړو اړخونو لخوا د دوامدارو همکاریو او ګډو رسنیزو نوښتونو پر پراختیا هوکړه وشوه.
