علاوالدین روزنتون کې د ۱۳۹۸ هجري شمسی ښوونیز کال پيل شو.
د علاوالدین نسوان روزنتون کې ۱۳۹۸ هجري شمسي ښوونیز کال د ټولنیزو چارو مرستیال غلام حیدر جیلاني له خوا د زنګ په وهلو سره پيل شو.
په همدې موخه جوړه شوې غونډه کې د روزنتونونو عمومي مشر فیضان احمد کاکړ د ۱۳۹۸ ښوونیز کال د پيل کیدو د مبارکۍ تر څنګ په ۱۳۹۷ کال کې د روزنتونونو ریاست د لاسته راوړنو په اړه خبرې و کړې، و یې ویل: سره د دې چې په تیر کال کې یو څه ستونزو سره مخ وو، خو بیا هم د وزارت د رهبرۍ په ښې همکارۍ سره مو و کړای شول، چې لس زره غریب او په خطر کې ماشومانو و روزو، همدارنګه د ترکیې هیواد په مرسته مو په څو ولایتونو کې روزنتونونه جوړ او د علاوالدین روزنتون مو هم ترمیم کړ او د شاګردانو د ظرفیت لوړولو په برخه کې مو د هندوستان او عربستان هیوادونو ملاتړ تر لاسه او شاګردانو ته مو بانکي حسابونه خلاص کړل.
وروسته د ټولنیزو چارو مرستیال غلام حیدر جیلاني، شاګردانو ته د نوي ښوونیز کال د مبارکۍ تر څنګ وویل، چې نن ډیر خوښ یم، چې د ستاسو په منځ کې یم، نوموړي زیاته کړه، چې یواځنۍ غوښتنه مې همدا ده، چې خپل قیمتي وخت او هغه امکانات چې په لاس کې لرئ، د زده کړې په برخه کې مصرف کړئ، شپه او ورځ کوښښ و کړئ، څو تر فراغت وروسته د هیواد ښو پوهنتونونو ته بریالي شئ، ځکه تاسو د هیواد راتلونکي یئ.
د ویلو دی، چې په دې پروګرام کې د ماشومانو له خوا ترانې او تمثیلي پارچې هم وړاندې شوې او غونډه په هیواد کې سراسري سولې ته د رسېدو په دعایې سره پای ته و رسیده.
