افغان ـ کوريا انستيتيوت کې د کوريا هيواد فرهنګي مرکز پرانستل شو.
دغه مرکز نن د يو لړ مراسمو په ترڅ کې د کار او ټولنيزو چارو وزارت د کاري چارو مرستيال سيدعبدالکريم هاشمي او د افغانستان لپاره د کوريا هيواد سفير له خوا، افغان ـ کوريا د فني او حرفوي زده کړو انستيتيوت کې د پټۍ په پريکولو سره پرانستل شو.
د مرکز د پرانستې پر مهال د افغانستان لپاره د کوريا هيواد سفير، افغانستان د کوريا يو ښه دوست هيواد ياد کړ، زياته يې کړه، چې افغانان او کوريا خلک زيات ګډ مشترکات لري، نوموړي وويل، چې په دې مرکز کې د کوريا هيواد اړوند معلوماتي کتابونه، سريالونه او سندرې ليدونکو ته د نمايش لپاره ايښودل شوي دي؛ د کوريا سفير همدارنګه وويل چې د دې مرکز له لارې به د مسؤلو کسانو له خوا د کوريا هيواد اړوند مخکنيو ستونزو او اوسنيو پرمختګونو په اړه ليدونکو سره معلومات شريکيږي.
د کار او ټولنيزو چارو وزارت د کاري چارو مرستيال سيد عبدالکريم هاشمي د خپلو خبرو په ترڅ کې له افغانستان په ځانګړې توګه د کار او ټولنيزو چارو وزارت سره د دوست هيواد کوريا له مرستو او افغان ـ کوريا انستيتيوت کې د ياد هيواد د فرهنګي مرکز جوړولو په پار مننه او د دې مرکز جوړيدل يې د دواړو هيوادنو د فرهنګي نظرياتو د تبادلې لپاره يو ښه فرصت ياد کړ.
ښاغلي هاشمي شاګردانو ته په خطاب وويل، چې موږ بايد له تير وختونو او ناخوالو څخه په تجربې بايد خپل راتلونکی ښه جوړ کړو او له هر فرصت څخه په ګټنې خپل ځان او ټولنې ته د خدمت مصدر و ګرځو.
افغان ـ کوريا د فني او حرفوي زده کړو انستيتيوت مسؤل مير جلال الدين هشام بيا وويل، چې دې مرکز څخه د انستيتيوت له شاګردانو علاوه نور هيوادوال هم کولای شي، ليدنه و کړي.
د ويلو دی، چې افغان ـ کوريا د فني او حرفوي زده کړو انستيتيوت ۲۰۰۴ کال کې د کوريا هيواد په مرسته جوړ او تر دې مهاله ورڅخه تر ۷۰۰۰ زيات هيوادوالو د فني او حرفوي زده کړو په برخه کې فراغت پاڼې تر لاسه کړې دي.
