د ټولنیزو چارو معین د ماشومانو له حمایوي مرکز څخه لیدنه وکړه؛
د کار او ټولنیزو چارو وزارت د ټولنیزو چارو معین الحاج شیخ عبدالبر د دې وزارت اړونده د ماشومانو له حمایوي مرکز څخه لیدنه ترسره او د یاد مرکز چارې یې له نږدې وڅارلې.
الحاج شیخ عبدالبر په دې لیدنه کې مرکز کې د مېشتو ماشومانو د وضعیت، د دوی د تعلیم او تربیې، د اعاشې او اباتې، د استوګنځایونو، د خدماتو د وړاندې کولو د څرنګوالي، د استادانو او مربیانو له لوري د تدریسي بهیر او حفظالصحې څخه څارنه وکړه او د چارو د لا ښهوالي په منظور یې مسؤلینو ته یو لړ سپارښتنې هم وکړې.
د ټولنیزو چارو معین خپلو خبرو کې د اسلام مبارک دین له نظره د ماشومانو د حقوقو او هم په دې برخه کې د کار او ټولنیزو چارو وزارت د مکلفیتونو او مسؤلیتونو څخه یادونه وکړه او د ماشومانو د حمایوي مرکز له مسؤلینو یې وغوښتل، چې مرکز کې د مېشتو ماشومانو په سالمه روزنه کې لازیاته پاملرنه وکړي.
هیره دی نه وي؛ چې په دې لیدنه کې د کار او ټولنیزو چارو وزارت د ماشومانو څخه د ساتنې رئیس مولوي سعدالدین مطمین هم د ټولنیزو چارو له معین سره ملتیا کوله.
