راستنېدونکو هېوادوالو ته د کاري فرصتونو د برابرولو کمېټې نوبتي ناسته ترسره شوه
د کار او ټولنیزو چارو وزارت؛ د کار چارو معین الحاج مولوي محمد زاهد احمدزي په مشرۍ؛ د مهاجرینو او بېرته راستنېدونکو چارو، صنعت او سوداګرۍ، اقتصاد او کرنې، اوبو لګولو او مالدارۍ وزارتونو د استازو په ګډون، بېرته راستنېدونکو هېوادوالو ته د کاري فرصتونو د برابرولو پر څرنګوالي کمېټې نوبتي ناسته ترسره شوه.
په دې ناسته کې د راستنېدونکو هېوادوالو ته د کاري فرصتونو د رامنځته کولو، د مهارتونو د ارزونې، د لنډ مهاله ګټورو برنامو تطبیق، د کار بازار اړتیاوو ته په کتو په بېلابېلو برخو کې د فني او حرفوي زدهکړو د پراختیا او د هغوی لپاره د دوامدارو کاري فرصتونو برابرولو په اړه هر اړخیز بحث وشو، چې نه یوازې د هغوی د اقتصادي وضعیت د ښهوالي لامل ګرځي، بلکې د ټولنې په اقتصادي ثبات کې هم اغیزمنه ونډه لري.
همداراز د کار چارو معین الحاج مولوي محمد زاهد احمدزي په خپلو خبرو کې وویل، چې راستنېدونکي هېوادوال له ګڼو ستونزو سره مخ دي او د هغوی ملاتړ د ټولو اړوندو ادارو ګډ مسئولیت بلل کېږي.
مولوي احمدزي د خبرو په دوام زیاته کړه؛ د امارتي ادارو او خصوصي ترمنځ د اغېزمنې همغږۍ له لارې باید راستنېدونکي هېوادوال لومړی په سمه توګه له ارزول کېدو وروسته د هغوی د مهارتونو او وړتیاوو له مخې په اړوندو برخو کې ورته کاري فرصتونه برابر شي.
یادونې وړ ده، چې د کار او ټولنیزو چارو وزارت د راستېدونکو هېوادوالو ستونزو ته د رسېدو په عالي کمېسیون کې د کارموندنې د کمېټې مشري پرغاړه لري او اړوند وزارتونه یې غړي دي؛ دا کمېټه په خپلو ناستو کې تر ډېره د بېرته راستنېدونکو هېوادوالو لپاره د کاري فرصتونو د برابرولو پر لارو چارو او په دې برخه کې د ګډو اقداماتو پر ترسره کولو تمرکز کوي.
