ننګرهار کې ۶۰۰ تنه ځوانان له فني او حرفوي زدهکړو څخه فارغ شول
د ننګرهار ولایت د کار او ټولنیزو چارو ریاست په هڅو او د ویژن سپلایی مؤسسې په همغږۍ؛ ۶۰۰ تنه هېوادوال د کوچنیو کاروبارونو جوړولو په حرفو کې د دوهمیاشتنیو نظري او عملي زدهکړو وروسته فارغ او تصدیقپاڼې ترلاسه کړي.
په همدې مناسبت جوړې شوې فراغت غونډې ته د ننګرهار ولایت د کار او ټولنیزو چارو رئیس مولوي مجیبالله عمر د اسلام مبارک دین له نظره د کسب او کار د ارزښت سربېره فارغ شویو ځوانانو ته په خطاب کې کې وویل: له ترلاسه شویو زدهکړو، تجربو او مهارتونو څخه په غوره ډول استفاده وکړئ، ترڅو خپلو کورنیو ته د حلالې نفقې د برابرولو وسیله او د هېواد د اقتصادي پیاوړتیا لامل وګرځئ.
همداراز نوموړي د خپلو خبرو په دوام زیاته کړه: د کار او ټولنیزو چارو وزارت د همکارو ادارو په همغږۍ سره هڅه کوي، چې ځوانانو؛ ته د کارموندنې په موخه د کار بازار اړتیاوو ته په کتو بېلابېلو برخو کې د فني او حرفوي زدهکړو زمینه برابره کړي، ترڅو په هېواد کې د بیکارۍ کچه راټیټه شي.
