د سایواک سازمان د راتلونکي کال کنفرانس به د خښتو بټیو کې د ماشومانو کار تر عنوان لاندې کابل کې جوړ شي.
د ټولنیزو چارو مرستیال غلام حیدر جیلاني د یاد معینیت له رهبري پلاوي سره په ناسته کې په مختلفو برخو کې د متضرره ماشومانو پر ستونزو لکه شاقه کار، په کوچیني سن کې د ماشومانو د ودونو او ماشومانو د قاچاق موضوعاتو ترڅنګ همدارنګه مالدیف هیواد ته د خپل وروستي کاري سفر او د سایواک سازمان کې د افغانستان په استازیتوب د فعاله ونډې په اړه معلومات وړاندې کړل و یې ویل، چې یاد کنفرانس کې د ۲۳ ګټګوریو متضرره ماشومانو پر ستونزو هر اړخیز بحثونه و شول.
ښاغلي جیلاني همدارنګه زیاته کړه، چې د سایواک سازمان د راتلونکي کال کنفرانس به د ۲۰۲۰ کال سپتمبر میاشت کې د خښتو په بټیو کې د ماشومانو کار تر عنوان لاندې کابل کې جوړ شي، چې احتمالي تمویل کوونکي به یې د کار نړیوال سازمان، یونیسف، د ماشومانو ساتنې سازمان، د هالنډ او ناروې هیوادونه وي.
د ټولنیزو چارو مرستیال دغه ډول کنفرانسونو جوړیدل مهم و بلل او زیاته یې کړه چې کابل کې د دغسې کنفرانسونو جوړیدل په نړیواله سطحه د افغانستان پرستیج جګوي او د سایواک سازمان د غړو هیوادونو له تجربو څخه د ګټنې یو ښه فرصت دی.
د ویلو دی، چې د ټولنیزو چارو معینیت د رهبرۍ پلاوي په ناسته کې د هیواد په سطحه د ماشومانو پر ستونزو، روزنتونونو او وړکتونونو کې دماشومانو د غذا، روزنتونونو او وړکتونونو د ښه ترمیم په اړه هم هر اړخیز بحثونه و شول.
