د کارکوونکو ظرفیت لوړول؛ د هرې ادارې بنسټیزه اړتیا ده.
د کار او ټولنیزو چارو وزارت؛ په کاري بهیر کې د چټکتیا، د کار کوونکو مسلکي پوهې او کاري ظرفیت لوړولو او همدا راز ښاریانو ته د اغیزمنو او ښو چوپړتیاوو وړاندې کولو په موخه د ظرفیت لوړونې درې اړین ښوونیز کاري پروګرامونه د وزارت د ظرفیت لوړونې آمریت له خوا جوړ شول، چې په پایله کې به تر سلو ډیر د کار او ټولنیزو چارو وزارت د دویمو واحدونو کارکوونکي ترې ګټه پورته کړي.
د ظرفیت لوړونې لمړۍ پروګرام د اداري مراسلاتو او پلان په برخه کې د ۱۳۹۸ کال د جدې له اوومې تر نولسمې نیټې پورې وو، چې د کابل ښار د وړکتونو لوی مدیریت ۳۸ تنه کارکوونکو پکې ګډون درلود او له یادې برنامې څخه برخمن شول.
د ظرفیت لوړونې دویمه برنامه هم د مراسلاتو او پلان په برخه کې د جدې له یوویشتمې د دلوې تر دریمې پورې ده، چې د وړکتونونو ۴۰ تنه لوی مدیران به له هغې څخه برخمن شي.
همدارنګه په اوسني عصر کې د انګلیسي ژبې اهمیت ته په کتو او په ځانګړې ډول په ټکنالوژیک میدان کې د هغې څخه په استفادې سره د کار او ټولنیزو چارو وزارت د بشري منابعو ریاست د وړکتونونو لوی ریاست؛ ۲۷ تنو کارکوونکو ته د انګلیسي ژبې درې میاشتنۍ برنامه د جدې په څلوریشتمه پیل کړه.
د یادولو وړ ده، چې د ظرفیت لوړونې یادو دریو برنامو څخه به کار او ټولنیزو چارو وزارت د دویمو واحدونو ټولټال ۱۰۵ تنه کارکونکي برخمن شي.
