د کار او ټولنیزو چارو وزیر سره د پياوړو ماشومانو نوښت مؤسسې رئیسې لیدنه
د کار او ټولنیزو چارو وزیر بشیر احمد ته ینج په داسې حال کې چې د ټولنیزو چارو مرستیال غلام حیدر جیلاني او ځینو رئيسانو هم حضور درلود، خپل کاري دفتر کې د پياوړو ماشومانو نوښت مؤسسې رئيسې میرمن لائل محب سره و کتل.
لیدنه کې د کار او ټولنیزو چارو وزیر وویل: د کار او ټولنیزو چارو وزارت اوس مهال د ټولنیز خوندیتوب په ځانګړې توګه استثنایي ماشومانو ( ذهني کم زوري ماشومان) ته زیاته پاملرنه او د کارونو په لومړیتوب کې یې ځای لري.
دې ناسته کې میرمن محب د استثنایي ماشومانو او د یادې مؤسسې د هوکړه لیک اړوند خبرې و کړې او د استثنایي ماشومانو اړوند یې د همکارۍ ژمنه و کړه.
بشیر احمد ته ینج د ټولو هغو مؤسسو څخه چې د استثنایي ماشومانو برخه کې کار کوي، مننه و کړه او د کار او ټولنیزو چارو وزارت سره په ښې همغږۍ او د دې قشر ماشومانو لپاره پر عدالت غوښتنه یې ټینګار و کړ.
د ویلو دی، چې د پياوړو ماشومانو نوښت مؤسسه د ( امید دریڅه) خیریه بنسټ او ( له بحران سره مخ ماشومان) دفتر سره په همکارۍ، له ۲۰۰۹ کال راهیسې د کار او ټولنیزو چارو وزارت سره د ذهني کم زورو ماشومانو برخه کې همکاري لري.
