غلام حیدر جیلانِي د کار او ټولنیزو چارو وزارت د ټولنیزو چارو مرستیال په صفت دنده پيل کړه
د کار او ټولنیزو چارو وزارت په وړاندیز او د جمهوري ریاست د عالي مقام په منظورۍ غلام حیدر جیلاني د ټولنیزو چارو، د نوي مرستیال په صفت د کار او ټولنیزو چارو وزیر فیض الله ذکي له خوا د دې وزارت کارکوونکو ته ور و پيژندل شو.
په همدې موخه جوړه شوې غونډه کې د کار او ټولنیزو چارو وزیر فیض الله ذکي د خپلو خبرو په لړ کې غلام حیدر جیلاني د دې وزارت د ټولنیزو چارو معینیت لپاره وړ شخص یاد کړ، زیاته یې کړه، چې ښاغلي جیلاني وړاندې وړاندې تر دې هم په مختلفو ټولنیزو برخو کې دندې تر سره کړي، نو په همدې اساس د وزارت د رهبري هیئت په وړاندیز او د جمهوري ریاست د عالي مقام په منظورۍ، د یاد معینیت مسؤلیت نوموړي ته و سپارل شو.
ښاغلي ذکي د ټولنیزو چارو نوي مرستیال ته د مبارکۍ تر څنګ سپارښتنه و کړه، څو د یاد معینیت او په ټوله کې د وزارت له کارکوونکو سره په پوره همغږۍ او همکارۍ کارونه ترسره کړي.
د ټولنیزو چارو نوي مرستیال غلام حیدر جیلاني د خپلو خبرو په ترڅ کې د وزارت له رهبري هیئت څخه پر ده د اعتماد او د یاد معینیت د دروند مسؤلیت ور سپارلو په اړه مننه و کړه، ژمنه یې و کړه، چې په پوره صداقت او ایماندارۍ به د خپل کاري ټيم سره د دې وزارت د ټولنیزو چارو په برخه کې خپل دنده ترسره کوي.
