معلوماتو ته لاسرسی؛ له وينا تر عمله
بې له شکه چې معلوماتو ته لاسرسی د ولسواکو او مدرنه حکومتونو يوه مهمه ځانګړتيا دی.
هغه معلومات چې د دولتي بنسټونو په واک کې دي، همغو ته لاسرسی دمعلوماتو د لاسرسي په نامه ياديږي، چې هم په نړيوالو قوانينو او هم د افغانستان اساسي قانون پنځوسمه ماده کې د يو بشري حق په توګه پيژندل شوي دي.
د افغانستان معلوماتو ته د لاسرسي قانون په يوه معتبره درجه بندۍ کې د نړۍ په سطحه يو غني قانون پيژندل شوی دی.
په همدې حال کې بيا د قانون درلودل يوه خبره اما په سمه توګه د هغه پلي کول بله مهمه خبره ده، د همدې قانون پر بنسټ ټول دولتي بنسټونه او ادارې مکلفې دي؛ څو د خپلو کړنو، لاسته راوړنو او ناکاميو اړوند معلوماتو له غوښتونکي سره شريک او ځواب ويونکي اوسي.
په دې وروستيو کې د افغانستان د رونټيا څار ( ديده بان شفافيت) ادارې له خوا د نړيوالو معيارونو او ارزونې او د معلوماتو ته د لاسرسي قانون د پلي کولو څخه د ارزونې په موخه يوه سروې ترسره شوې وه، چې د ياد بنسټ د ارزونو په اساس د کار او ټولنيزو چارو وزارت يو له ځواب ويوونکو ادارو څخه پيژندل شوی دی او د شل سروې شوېو ادارو په منځ کې يې پنځمه درجه ګټلې ده.
دغه درجه د کار او ټولنيزو چارو وزارت ته د رونټيا څار ( ديده بان شفافيت) له خوا د دې وزارت د ويب سايټ د څيړنې، د معلوماتو ته د لاسرسي ادرس رامنځ ته کولو، ځواب ويلو، د مالي او اداري چارو مرستيال مسعود الله اورياخيل او د دې وزارت د معلوماتو ته د لاسرسي مسؤل سره د مرکو له امله ور کړل شوې ده.
