د بشري ځواک په لوی ریاست کې د پښتني بانک څانګه پرانستل شوه
د کار او ټولنیزو چارو وزارت د بشري ځواک په لوی ریاست کې د مراجعینو او کارکوونکو لپاره د نورو اسانتیاوو رامنځته کولو په موخه نن د دواړو لوریو چارواکو په شتون کې د پښتني بانک څانګه پرانېستل شوه.
د پرانېست غونډې په پیل کې د کار او ټولنیزو چارو وزارت؛ مالي او اداري چارو معین الحاج مولوي دینمحمد حقبین په خپلو خبرو کې وویل: د پښتني بانک د څانګې په پرانېستلو سره به د مراجعینو او کارکوونکو د وخت له ضایع کېدو او همدارنګه د هغوی له سرګردانیو مخنیوی وشي.
مولوي حقبین په خپلو خبرو کې زیاته کړه: د افغانستان اسلامي امارت په ځانګړې ډول د کار او ټولنیزو چارو وزارت دنده او مسؤلیت ده، ترڅو په بېلابېلو برخو کې د هېوادوالو ستونزې په نښه او د حل په موخه یې هراړخیزې هڅې وکړي.
ورپسې د بشري ځواک لوی رئیس مولوي عزتالله عارف د پښتني بانک له همکاریو څخه د مننې ترڅنګ وویل: د څانګې په پرانېستلو سره به مراجعینو ته د سهولتونو د ایجاد سربېره؛ زموږ همکاران هم وکولای شي چې خپل معاشات په خپل وخت او په اسانه توګه تر لاسه کړي.
د پښتني بانک رئیس عبدالواحد رحیمي د کار او ټولنیزو چارو وزارت سره په همغږۍ د یادې څانګې په پرانېسته خوښۍ څرګنده کړه او مراجعینو ته په بېلابېلو برخو کې د زیاتو سهولتونو د برابرولو ژمنه وکړه.
