د مالي او اداري چارو معین د کار او ټولنیزو چاررو وزارت د علماوو شورا له مسئولینو سره وکتل
د کار او ټولنیزو چارو وزارت؛ د مالي او اداري چارو معین الحاج مولوي عبدالعزیز نصیر د خپل کار په دفتر کې د وزارت د علماوو شورا له مسئولینو سره د امر بالمعروف او نهي عن المنکر د قوانینو د مؤثر او غوره تطبیق په موخه وکتل.
په یاده ناسته کې دواړو لوریو د اسلام د سپېڅلي دین پر اهدافو او ارزښت، د اسلامي اصولو پر بنسټ د ټولنې د اصلاح او سمون، په ټولنه کې د الهي قوانینو پلي کولو، خلک نېکېو، تقوا او دیني ارزښتونو ته هڅولو، ټولنه د قرآن او سنتو پر بنسټ اصلاح کولو، د کار کوونکو صورت او سیرت د اسلامي اصولو پر بنسټ برابرولو، مسؤلیت په صداقت سره اداء کولو، په کاري چاپېریال کې د قوانینو د غوره تطبیق، په چارو کې ښه والي او د کارکوونکو ترمنځ د ښو اړیکو د رامنځته کولو په اړه تفصیلي خبرې وکړې.
مالي او اداري چارو معین الحاج مولوي عبدالعزیز نصیر په خپلو خبرو کې وویل: هر ریاست باید د امربالمعروف او نهي عنالمنکر د قوانینو په غوره تطبیق کې د دعوت او ارشاد له ریاست له مسئولینو سره پوره همکاري وکړي.
د یادونې وړ ده؛ چې په یاده ناسته کې د مالي او اداري چارو مشاور شیخ نعیم ګل صدیقي، د دعوت او ارشاد رئیس مولوي عبدالولي حماد، د کار کوونکو چارو رئیس مولوي نعمتالله عثماني او د وزارت مسجد ملا امام مولوي صلاحالدین وزیري هم حضور درلود.
.
