د مهارتونو ملي شورا جوړولو طرحه په پرنسیپ کې تائید شوه.
د کار او ټولنیزو چارو وزارت د خصوصي سکتور سره په همغږۍ، پام کې لري، چې د مهارتونو ملي شورا جوړه کړي؛ په همدې موخه نن د کار او ټولنیزو چارو سرپرست سید انور سادات د خصوصي سکتور مختلفو برخو مسؤلینو سره د مهارتونو ملي شورا پر طرحې هر اړخیز بحث و کړ او د دې شورا طرحه یې په پرنسیپ کې تائيد کړه.
د کار او ټولنیزو چارو وزارت سرپرست سید انور سادات د یادې شورا رامنځ ته کول، د خصوصي سکتور سره په همغږۍ په کور دننه د ماهرو افغان کارګرو لپاره د کاري فرصتونو او بې کارۍ په له منځ وړلو کې مهمه یاده کړه او هیله یې څرګنده کړه، چې د دولتي او خصوصی سکتور سره په ګډه همکارۍ به د دې شورا د لا ښې رهبرۍ او پر مخ وړلو لپاره هڅې و کړي.
سید انور سادات د مهارتونو ملي شورا په را منځ ته کولو کې د خصوصي سکتور ترڅنګ د سکتوري وزارتونو او ادارو رول مهم یاد کړ او هیله یې څرګنده کړه، چې د سکتوري وزارتونو استازي هم په راتلونکي ناستو کې ګډون و کړي او د دې طرحې په لا بډاېنه کې خپل ګټور نظرونه د کار او ټولنیزو چارو وزارت سره شریک کړي.
په ناسته کې د خصوصي سکتور استازو هم د خپلو خبرو په ترڅ کې د کار او ټولنیزو چارو وزارت دغه هڅه و ستاییله او هیله یې و ښوده، چې هر څومره ژر دغه شورا را منځ ته شي؛ دوې همدارنګه د خپلو خبرو په ترڅ کې د خصوصي سکتور په استازیتوب د یادې شورا سره د همکارۍ ژمنه و کړه.
د دې شورا موخه په هیواد کې د ماهرو کارګرو روزلو، د کار بازار او خصوصي سکتور د اړتیاوو مطابق د خدمتونو وړاندې کولو لپاره د حل لارو چارو لټول دي.
دغه شورا به د کار او ټولنیزو چارو وزارت په رهبرۍ د سوداګرۍ ملي او صنایعو ټولنو، سکتوري وزارتونو، د فني او حرفوي زده کړو مرکزونو په غړیتوب را منځ ته او د کار بازار مطابق به د ماهرو کارګرو روزلو او په کور دننه د هیوادوالو لپاره د کاري فرصتونو را منځ ته کولو لپاره هلې ځلې کوي.
