د ټولنیزو چارو معین د افرن مؤسسې رئيس سره وکتل
د کار او ټولنیزو چارو وزارت د ټولنیزو چارو معین الحاج مولوي عبیدالله امینزاده د خپل کار په دفتر کې له افغانانو سره د فرانسوي ولس د دوستۍ (افرن) مؤسسې رئيس پولین لهپونت سره وکتل.
په پیل کې د افرن مؤسسې رئیس پولین لهپونت په افغانستان کې د خپلو خدماتي فعاليتونو، راتلونکي پلانونو په ځانګړي ډول پروان ولایت کې د بېسرپرستو ماشومانو د تعلیم، تربیې د فني او حرفوي زده کړو په څرنګوالي او په روزنتونونو کې د بېوزلو، یتیمو او بېسرپرستو ماشومانو ته په زدهکړو کې د لا غورهوالي په اړه خبرې وکړې.
د ټولنیزو چارو معین الحاج مولوي عبیدالله امینزاده د افرن همکارې مؤسسې د فعاليتونو د ستاینې سربېره وويل: یتیمو او بېسرپرسته ماشومانو څخه ملاتړ، هغوی ته د ژوندانه د اسانتیاوو د برابرولو، ښوونې او روزنې، روغتیا او سرپناه ته یې پاملرنه د کار او ټولنیزو چارو وزارت له لومړيتوبونو څخه دي.
مولوي عبیدالله امینزاده زیاته کړه: له بېسرپرستو ماشومانو څخه د کفالت او پورتنیو ذکر شویو موخو ته د رسیدنې لپاره د کار او ټولنیزو چارو وزارت په ټول هېواد روزنتونونه فعال کړي دي، او په دې برخه کې د ملي او نړیوالو بنسټونو مرستو او فعالیتونو ته هم اړتیا لیدل کیږي.
مولوي امینزاده زیاته کړه، د افغانستان اسلامي امارت په راتګ سره په ټول هېواد کې سرتاسري امنيت تأمین دی؛ نو له ټولو همکارو مؤسساتو او خیریه بنسټونو څخه غوښتنه کوو ترڅو د اسلامي امارت د اصولو او قوانینو په رڼا کې خپلو فعالیتونو ته ادامه ورکړې او بالخصوص د یتیمو او بېسرپرستو ماشومانو لاسنیوی وکړي.
