د کار او ټولنیزو چارو وزارت اړوند؛ د کار انسټیټیوټ له لوري د امارتي ادارو کارکوونکو ته د ظرفیت‌لوړونې په موخه په کابل او غزني ولایتونو کې د مالیې، سرحداتو، قومونو او قبایلو، شهدا او معلولینو، د اوبو او انرژي، اقتصاد، د کور او ښارجوړونې، کډوالو او راستنېدونکو چارو وزارتونو، د امتحاناتو او چاپېریال ساتنې ملي ادارو ۱۵۰ تنه کارکوونکو ته (د مدیریت او ادارې  له مفاهمو سره د اشنایی، د ناستو مدیریت، دوسیه‌بندي او تدریسي میتودلوژی) تر نامه لاندې شپږ ورځیني ښوونیز ورکشاپونه وړاندې شول.

په کابل ښار کې په همدې مناسبت جوړه شوې غونډې ته د کار او ټولنیزو چارو وزارت اړوند د کار انسټیټیوټ رئیس شریف‌الله شرافت په خپلو خبرو کې د مهارتونو پر پراخوالي، د رهبري او مدیریت په غښتلتیا، منابعو پیدا کول او د هغوی غوره مدیریت، د اداري بنسټونو پر پیاوړتیا، په اداره کې نوښت او خلاقیت ته وده ورکول، ټولنیزو خدمتونو د لاښه والي او په اداره کې د مؤثرو اړیکو د رامنځته کولو په اړه په تفصیل سره خبرې وکړي. او له ګډونوالو یې وغوښتل، چې په دې پروګرام له ترلاسه شویو زده‌کړو، مهارتونو او تجربو څخه په استفادې هېوادوالو ته غوره او ګټور خدمات وړاندې کړي. 

نوموړي همداراز ډاډ څرګند کړ، چې د وخت اړتیاوو ته په کتو سره به په خپلو روزنیزو پروګرامونو او برنامو کې په کمي او کیفي توګه پراخوالی راولي.