معلولو مجاهدینو ته د فني، حرفوي او مدیریتي زدهکړو زمینه برابرېږي
د افغانستان اسلامي امارت د امیرالمؤمنین مولوي هبةالله حفظةالله د حکم په اساس د کار او ټولنیزو چارو وزارت په مشرۍ، د دفاع وزارت او تخنیکي او مسلکي زدهکړو ادارې ته دنده سپارل شوې ده؛ چې معلولو مجاهدینو له تثبیت او تشخیص وروسته د فني، حرفوي او اداري زدهکړو زمېنه برابره کړي.
هغې ناستې ته چې په همدې مناسبت د کار او ټولنیزو چارو په وزارت کې د ځینو پورته ذکر شویو ادارو د استازو په شتون کې جوړه شوې وه؛ د کار او ټولنیزو چارو سرپرست وزیر الحاج ملا عبدالمنان عمري وویل: د مشرتابه د حکم په اساس دا زموږ او ستاسې دنده ده؛ چې معلول مجاهدین په امنیتي ادارو شهیدانو او معلولینو چارو وزارت او همدارنګه په ښار، ولسوالیو او کلیو کې تثبیت او تشخیص کړو، د ملي دفاع وزارت سره په همکارۍ د هر ولایت په کچه هغوی ته د فني، حرفوي او اداري زدهکړو او استوګنې مرکزونه ترتیب او تنظیم کړو، ترڅو هغوی مسلکي زدهکړې ترلاسه کړي او په راتلونکي کې د ادارې او مدیریت په برخه کې ادارو او همدارنګه د ماهر او مسلکي کاریګر په توګه د کار بازار کې خپل خدمات وړاندې کړي.
ملا عبدالمنان عمري زیاته کړه: د مرکز او همدارنګه د حرفې او مسلک انتخاب د هر معلول مجاهد وړتیا او په خوښه یې تر سره کېږي.
د ناستې په پای کې پرېکړه وشوه؛ چې د هرې ادارې اړونده دندې او مسئولیتونه به د رسمي مکتوب په اساس پورته ذکر شویو ادارو ته استول کېږي؛ ترڅو په یاد ډګر کې عملي فعالیت پیل شي.
