کندهار ولایت کې ۱۱۰ تنه ځوانان د مختلفو حرفو څخه فارغ شول
د کندهار ولایت د کار او ټولنیزو چارو ریاست اړوند د فن او حرفې له مرکز څخه ۱۱۰ تنه ځوانان چې مختلفو حرفو کې یې شپږ میاشتې زدهکړې ترلاسه کړې وې فارغ، او پر هغوی د فراغت د سندونو سربېره؛ کاري وسایل هم ووېشل شول.
هغه ناسته چې په همدې مناسبت جوړه شوې وه او په کې د مختلفو ادارو او د HHRD مؤسسې استازو ګډون درلود، د کندهار ولایت د کار او ټولنیزو چارو رئیس الحاج ملا محمد انور حاجي ګللالا مېلمنو ته ښه راغلاست سربېره، خپلو خبرو کې وویل : یادو ۱۱۰ تنه ځوانانو چې د مبایل د ترمیم، د تعمیراتو د برښنا، مستري توب، خیاطۍ او نجارۍ په برخو کې د شپږو میاشتو لپاره زدهکړې کړي او پهدې موده کې هغوی ته د ۸ زرو افغانیو په ارزښت خوراکي توکي هم د مرستو په توګه ورکول کېدل چې نن یې د فراغت مراسم دي او د فراغت سندونو سربېره هغوی ته کاري وسایل هم په پام کې نیول شوي.
د کندهار ولایت د کار او ټولنیزو چارو رئیس هیله څرګنده کړه چې یاد فارغ شوي ځوانان به وتوانیږي چې د ماهرو او نیمه ماهرو کارګرو په څېر د کار بازار کې شامل او له دې لارې به خپلو کورنیو ته حلاله نفقه برابره کړي.
