د کار او ټولنیزو چارو وزارت مشرتابه پلاوي ناسته ترسره کړه
د ترتیب شوې اجنډا سره سم د کار او ټولنیزو چارو وزارت مشرتابه پلاوي؛ د کار او ټولنیزو چارو وزیر ښاغلي بشیراحمد ته ینج په مشرۍ او د مرستیال وزیرانو،سلاکارانو، رئیسانو او نورو مسئولینو په شتون کې؛ ناسته ترسره کړه.
د وزارت مقام ټولو کارکوونکو ته د تیر شوې کمکید اختر مبارکۍ ترڅنګ، د مالي او اداري معینیت د تدارکاتو مشاور خدای بخښلی نثاراحمد ابراهیمي پر مړینه خواشیني څرګنده کړه او ستر څښتن تعالی له دربار څخه یې ښاغلي ابراهیمي ته د جنت الفردوس ا وکورنۍ ته یې د جمیل صبر غوښتنه وکړه. وروسته یې د مرستیال وزیرانو له فعالیتونو او کاري کړنو په ځانګړې ډول د کار مرستیال وزیر ښاغلي اجمل شاه پور چې په تیرو څو ورځو کې یې د وزارت سرپرستي پرغاړه درلوده؛ له فعالیتونو ستاینه او مننه وکړه او وویل چې خوښ یم په وزارت کې یو ژمن ټیم منځته راغلی دی او د خوشحالۍ ځای دي چې ټول کارونه په غوره توګه پر مخ روان دي.
په یاده ناسته کې د کار او ټولنیزو چارو وزارت مرستیالانو کاري اجراآت د وزارت مقام ته وړاندې شول، د بیلابیلو ننګونو او ستونزو په هکله هراړخیز توګه بحثونه ترسره شول او ستونزو ته د چټګې رسیدګۍ په موخه؛ مسئولینو ته اصلاحي هدایات او لارښوونې وشوې.
