د کار او ټولنیزو چارو وزارت سرپرست، د دې وزارت د ولایتي رئیسانو لپاره د کاري سمون او همغږۍ سمینار په وروستۍ ورځ کې ګډون او وینا وکړه.
د کار او ټولنیزو چارو وزارت سرپرست وزیر الحاج ملا عبدالمنان عمري، د دې وزارت د ولایتي رئیسانو د کاري سمون او همغږۍ سمینار په وروستۍ ورځ کې ګډون او وینا وکړه.
ناسته کې چې د وزارت مقام د دفتر رئیس ملا شرفالدین شرف هم حضور درلود، د کار او ټولنيزو چارو سرپرست وزیر خپله وینا کې ولایتي رئیسانو ته د ښه راغلاست ويلو ترڅنګ هیله څرګنده کړه، چې هغوی دې وکولی شي ترڅو له سیمینار څخه خپل برداشتونه او لاسته راوړنې په خپلو ورځنیو چارو کې تطبیق او هم دې له خپلو مربوطه کارکوونکو سره شریکې کړي.
ښاغلي ملا عبدالمنان عمري ولایتي رئیسانو ته په خطاب کې وویل: دا چې د دې وزارت کاري ساحه د یتیمانو په ګډون د ټولنې مظلومو طبقو پورې تړلې ده؛ نو زمونږ ټولو ګډ مسؤلیت دی چې په ټول توان سره خپلو ولسونو ته لازم خدمات وړاندې کړو. همداراز يې ټینګار وکړ چې مقرریو کې دې وړ او مستعدو اشخاصو ته لومړیتوب او هغوی دې جذب او استخدام شي، ښاغلي عمري د خپلو خبرو په دوام وویل: بهرنیو هېوادونو ته د ماهرو افغان کار ګرانو د لېږد په اړه هم د ځينو هېوادونو له استازو سره په اړیکه کې یو او خپله ټوله هڅه به په کار واچوو چې د دې پروسې عملي کار پیل شي ترڅو په دې برخه کې وطنوالو ته ښه زیری ولرو.
د کار او ټولنیزو چارو سرپرست وزیر د ځينو موسساتو د فعالیتونو په اړه هم وینا درلوده او له مسؤلینو يې و غوښتل په هغه صورت کې چې د مؤسساتو ټول فعالیتونه د ریاست الوزرا مقام څخه د تایید شوي طرزالعمل سره موافق وي هغوی سره دې همکاري وکړي او هم دې د مرستو د وېش په وخت کې عدالت له پامه نه غورځوي، په همدې توګه يې د دې وزارت په تشکیل کې د کار انستیتیوت د رامنځته کېدو څخه چې په نژدې وخت کې به په فعالیت پیل وکړي هم خبر ورکړ او د جوړېدو موخه يې د مسلکي، مجربو او په کار پوه اشخاصو روزل وبلل. په پای کې یې سپارښتنه درلوده، چې اړونده رياستونه دې ولسونو ته د صادقانه خدماتو د وړاندې کولو په برخه کې خپلې هڅې نه سپموي.
ور پسې د ولایتي رئیسانو په استازولۍ، د کاپيسا ولايت د کار او ټولنيزو چارو رئیس مولوي عزت الله عارف خبرې وکړې او د وزارت مقام څخه يې د سمینار د جوړېدو په اړه مننه او قدر داني وکړه او په راتلونکي کې د داسې نورو برنامو د دایرېدو غوښتونکی شو او د ولایتي ریاستونو اړوند ځينې وړاندیزونه او ستونزې یې شریکې او د کار او ټولنیزو چارو وزارت له سرپرست څخه يې د مرستې او پاملرنې غوښتنه وکړه چې د ښا غلي ملا عبدالمنان عمري لخوا د امکان تر بریده د همکارۍ او مرستې ډاډ ورکړل شو.
