د کار او ټولنیزو چارو وزارت تخنیکي ټیمونو د پنجشنبې په ورځ تورخم او د پکتیکا ولایت په انګور اډه کې د بېرته راستنېدونکو کډوالو لپاره اړین خدمات ترسره کړل
د افغانستان د اسلامي امارت له لوري بېرته راستنېدونکو کډوالو ته د خدماتو د تنظیم کمیټې تر چتر لاندې او د کار او ټولنیزو چارو سرپرست وزیر الحاج ملا عبدالمنان عمري د هدایت په اساس، تورخم او انګور اډه کې مېشت د دې وزارت تخنیکي ټیمونو د پنجشنبې په ورځ ۵۵۸تنه بېرته راستانه شوي کډوال سیستم کې ثبت او په مختلفو برخو کې یې د هغوی لاسنیوی وکړ.
تورخم کې د کار او ټولنیزو چارو وزارت د تخنیکي ټیم په وینا دوی توانیدلی چې د پنجشنبې په ورځ د ۳۴۷تنه بېرته راستانه شويو هېوادوالو په سیستم کې د ثبت سربېره مختلفو برخو کې هغوی سره مرستې وکړي. په همدې توګه یاد ټیم د مهاجرینو د بیا راستنېدو څخه تر دې مهاله ۲۹۲تنه ماشومان چې له خپلو کورنیو څخه ورک شوي وو تورخم کې بېرته له خپلو کورنیو سره یوځای کړي او هم ۱۴۳تنه لادرکه شوي ماشومان ولایتونو ته تر انتقال وروسته خپلو کورنیو ته سپارلي دي.
د یوبل خبر له مخې د پکتیکا ولایت په انګور اډه کې هم د کار او ټولنیزو چارو وزارت تخنیکي ټیم د تېرو چهارشنبه او پنجشنبه په ورځو ۲۱۱تنه بېرته راستانه شوي هېوادوال په سیستم کې ثبت او مختلفو برخو کې هغوی سره مرستې کړيدي.
